Որակավորման հավաստագրեր ստացան ՀՀ կրտսեր և առաջատար քաղծառայողները

«Հարգելի քաղծառայողներ, շնորհավորում եմ ձեզ դասընթացի ավարտի առիթով և մաղթում եմ, որ հաջորդ դասընթացին մասնակցեք որպես գլխավոր մասնագետներ»,- այսօր քաղծառայողներին որակավորման հավաստագրեր հանձնելուց հետո ասաց        ՀՊՏՀ շարունակական և լրացուցիչ կրթության կենտրոնի պետ Քրիստինե Գալստյանը: Այնուհետև լրատվության և հասարակայնության հետ կապերի բաժնին նա տեղեկացրեց, որ այդ խմբում ընդգրկված էին տարբեր գերա­տեսչություններից  33 առաջատար և կրտսեր պաշտոններ զբաղեցնող ՀՀ քաղծառայողներ, ովքեր վերապատրաստվում էին «Տեղեկատվական տեխնոլոգիաները կառավարման համակարգում» ծրագրով:

Նա ավելացրեց նաև, որ ՀՊՏՀ շարունակական և լրացուցիչ կրթության կենտրոնը, համագործակցելով  ՀՀ քաղաքացիական  ծառայության խորհրդի  հետ և հիմք ընդունելով  ՀՀ  ՔԾԽ -ի կողմից  ներկայացված 2013 թվականի  ժամանակացույցը, այսօր ավարտեց վերջին  խմբում հայտագրված  ՀՀ քաղծառայողների վերապատ­րաստ­ման դասընթաց­ները:

Հավաստագրերի հանձնման ընթացքում քաղծառայողները շարունակական և լրացուցիչ կրթության կենտրոնի աշխատակից Աիդա Առուստամյանին հանձնեցին նամակ, որը շնորհակալական խոսք էր` ուղղված ՀՊՏՀ ռեկտոր Կորյուն Աթոյանին: Քաղծառայողները մասնավորապես շնորհակալություն էին հայտնում դասընթացների արդյունավետ կազմակերպման, լավագույն պայմաններ ստեղծելու համար: Նրանք իրենց գոհունակությունն էին արտահայտում դասախոսներից և ՀՊՏՀ շարունակական և լրացուցիչ կրթության կենտրոնից` կազմակերպված ու բարեխիղճ աշխատանքի համար:

Կենտրոնից լրատվության և հասարակայնության հետ կապերի բաժնին են տրամադրել նաև հետևյալ տեղեկատվությունը, որում նշվում է. «2013 թվականին ՀՊՏՀ-ն  ՀՀ քաղաքացիական ծառայության խորհրդի կողմից հայտարարված ՀՀ քաղաքացիական ծառայողների վերապատ­րաստման ծրագրերի մրցույթում  «Քաղաքաշինություն»,  «Տեղեկատվական տեխնոլոգիաները կառավարման համակարգում» և «Պետական գույքի կառավարում» ծրագրերի հաղթող էր ճանաչվել: Համաձայն ՀՀ քաղծառայության  խորհրդի  կողմից  հաստատված և  ներկայացված ծրագրերի, Հայաստանի Հանրապետության տարբեր նախարարություններից   և գերատեսչություններից Կենտրոնում 2013 թվականի մարտի 25-ից մինչև 2013 թվականի նոյեմբերի 15-ը վերապատրաստվել են 281 ՀՀ քաղծառայողներ, որոնցից 85-ը բարձրագույն և գլխավոր, իսկ 196-ը առաջատար և կրտսեր պաշտոններ զբաղեցնող մասնագետներ»:

ՀՊՏՀ Լրատվության և հասարակայնության հետ կապերի բաժին