Մեր բուհում այսօր հյուրընկալվեց Թբիլիսիի Իլիա պետական համալսարանի պրոֆեսոր Մարիկա Կապանաձեն
Տեմպուս ծրագրի ազգային գրասենյակի նախաձեռնությամբ ՀՊՏՀ նիստերի սրահում այսօր հյուրընկալվեց Թբիլիսիի Իլիա պետական համալսարանի պրոֆեսոր Մարիկա Կապանաձեն: Ներկայացնելով հյուրին` Տեմպուս ծրագրի ազգային գրասենյակի համակարգող Լանա Կառլովան նշեց, որ վրացուհի պրոֆեսորը հաջողությամբ համակարգել է նմանատիպ ծրագրեր, այս բնագավառում ունի հարուստ փորձ և պատրաստ է այն ներկայացնելու ՀՊՏՀ-ի` Տեմպուսի շրջանակներում շահած երեք ծրագրերից մեկի` «Հայկական համակարգման գործակալություն «Համալսարան-գործատու»» («Արարատ») ծրագիրը համակարգող թիմի անդամներին:
Մարիկա Կապանաձեն, ծանոթացնելով Թբիլիսիի Իլիա պետական համալսարանի հետ, նշեց, որ այն Վրաստանի ճանաչված բուհերից մեկն է: Այստեղ 2006 թվականից սկսած հաջողությամբ իրականացվել են բազմաթիվ միջազգային նախագծեր, որոնցից 21-ը` Եվրամիության Տեմպուս ծրագրի շրջանակներում: Բանախոսի դիտարկմամբ` նմանատիպ ծրագրերի հաջող իրականացման ամենակարևոր գրավականներն են ճիշտ կառավարումը, նվիրումով, սիրով ու պատասխանատվությամբ աշխատող թիմը: Այնուհետև Մարիկա Կապանաձեն պատմեց այն հաջողությունների ու ձեռքբերումների մասին, որոնց հասել են Տեմպուս ծրագրի իրականացման ընթացքում:
Ավարտին` բանախոսը պատասխանեց ՀՊՏՀ-ի` Տեմպուսի շրջանակներում իրականացվող` «Հայկական համակարգման գործակալություն «Համալսարան-գործատու»» («Արարատ») ծրագիրը համակարգող թիմի անդամների հարցերին:
Հիշեցնենք, որ ինչպես ավելի վաղ տեղեկացրել էինք, Հայաստանի պետական տնտեսագիտական համալսարանը Տեմպուսի 3 ծրագիր է շահել: Դրանցից մեկի` «Հայկական համակարգման գործակալություն «Համալսարան-գործատու»» («Արարատ») ծրագրի դեպքում դարձել է համակարգող:
ՀՊՏՀ Լրատվության և հասարակայնության հետ կապերի բաժին