ՀՊՏՀ ռեկտոր Կորյուն Աթոյանի ելույթը ՀՊՏՀ 22–րդ գիտական նստաշրջանի բացմանը

Մեծարգո Վարչապետ,
Հարգարժան հյուրեր, գործընկերներ,
Ուրախ եմ ողջունել Հայաստանի պետական տնտեսագիտական համալսարանի գիտական նստաշրջանի մասնակիցներին և հյուրերին: 
Նստաշրջանը կանցնի «Ազգային տնտեսության մրցունակության բարձրացման հիմնախնդիրները» խորագրի ներքո:
Համալսարանում անցկացվող գիտական նստաշրջանները փորձագիտական յուրօրինակ հարթակ են Հայաստանի և համաշխարհային տնտեսության հրատապ հիմնախնդիրների քննարկման համար:
Այստեղ ավանդաբար հավաքվում են պետական կառավարման մարմինների, քաղաքական և գործարար ոլորտի ներկայացուցիչներ, համալսարանի գիտամանկավարժական անձնակազմը և, իհարկե, մեր գործընկերները մյուս համալսարաններից: 
Համալսարանական գիտական նստաշրջանների նպատակը մեկ տարում կատարված գիտահետազոտական աշխատանքների արդյունքների համախմբված ներկայացումն է և հետազոտությունների հետագա ուղղությունների նախանշումը:
Հայաստանի Հանրապետության Կառավարությունը որդեգրել է համալսարանական գիտության զարգացման քաղաքականություն, ինչը մեծ պատասխանատվություն ու պատիվ է մեզ համար: Համալսարանական գիտնականները, բացի իրենց շնորհակալ ու արժանապատիվ առաքելությունից՝ ժամանակի պահանջներին համապատասխան գիտելիքներով և կառավարման արդիական գործիքներին տիրապետող մասնագետների պատրաստումից, ունեն ևս մեկ կարևոր առաքելություն, որը, կարծում եմ, դեռևս լիարժեք իրացված չէ: Այն է՝ hանրապետության Կառավարության հայտարարած տնտեսության զարգացման գերակայությունների կենսագործման մեխանիզմների վերաբերյալ առաջարկությունների մշակումը:
Հարկ է նշել, որ այդ տեսակետից Հայաստանի տարբեր համալսարաններ, այդ թվում՝ Հայաստանի պետական տնտեսագիտական համալսարանը, մշտապես հանդես են եկել նախաձեռնություններով:
Ակնհայտ է, որ արագ փոփոխվող աշխարհում տեղի ունեցող գործընթացները և համաշխարհային տնտեսության զարգացման վերջին շրջանի միտումներն ի հայտ են բերում նորանոր մարտահրավերներ, որոնք պահանջում են համարժեք պատասխաններ:
ՀՀ կառավարությունը հետճգնաժամային ժամանակահատվածի համար սահմանել է երեք գերակայություն՝ 
• տնտեսության մրցունակության բարձրացում՝ որպես երկարաժամկետ կայուն աճի գլխավոր պայման, 
• մարդկային կապիտալի զարգացում,
• ինստիտուցիոնալ կարողությունների զարգացում:
Արձագանքելով ՀՀ կառավարության 2012-2017թթ. ծրագրին, ինչպես նաև կարևորելով բուհական գիտության մասնակցությունը երկրի զարգացման ծրագրերի իրականացմանը՝ Հայաստանի պետական տնտեսագիտական համալսարանում հայտարարվել է նշված գերակայություններին առնչվող գիտահետազոտական նախագծերի ներքին գիտական դրամաշնորհների մրցույթ: Ներկայացվել է 19 հայտ՝ շուրջ 50 մլն դրամ ընդհանուր արժողությամբ: Ներկայումս այդ նախագծերը փորձաքննության փուլում են, որից հետո մրցութային հանձնաժողովը որոշում կկայացնի դրամաշնորհների հատկացման վերաբերյալ: Այս նախաձեռնությունն ընդամենը մեկն է միջոցառումների շարքից, որոնք նախատեսվել է իրականացնել համալսարանում գիտահետազոտական գործունեության ակտիվության բարձրացման ուղղությամբ: Նախատեսվում է ստեղծել հետազոտական խմբեր և կիրառել նոր, ոչ ստանդարտ մոտեցումներ` երկրի զարգացման հրատապ հիմնախնդիրների առնչությամբ լուծումներ մշակելու, մեր գիտնականների ակադեմիական շարժունությունը բարձրացնելու նպատակով: 
Համալսարանի գիտնականները պարբերաբար մասնակցում են միջազգային գիտաժողովներին, արտասահմանյան պարբերականներում հրապարակում իրենց հետազոտությունների արդյունքները, սակայն, հետազոտությունների միջազգայնացման առումով դեռևս շատ անելիքներ կան: Այդ ուղղությամբ հնարավոր չէ էական հաջողությունների հասնել առանց մեր մյուս համալսարանների հետ սերտ համագործակցության: Համագործակցության ձևաչափերի և ուղղությունների մշակման համար, անշուշտ, կպահանջվեն հաճախակի հանդիպումներ ու քննարկումներ: 
Այդ տեսակետից, այս գիտական նստաշրջանը միտված է նաև այդպիսի քննարկումների ակտիվացմանը:
Հարգելի մասնակիցներ, մեզ սպասվում են նորարական քաղաքականության, ֆինանսական շուկաների և ենթակառուցվածքների զարգացման, սոցիալ-տնտեսական զարգացման գերակայություններին նվիրված հարցերի քննարկումներ, որոնք կարևոր են երկրի տնտեսության մրցունակության բարձրացման տեսանկյունից:
Հարգելի գործընկերներ, մեզ համար մեծ պատիվ է գիտական նստաշրջանին հանրապետության վարչապետի մասնակցությունը, որի համար բոլորիս անունից շնորհակալություն եմ հայտնում մեծարգո վարչապետին:
Շնորհակալություն եմ հայտնում նաև մեր գործընկեր համալսարաններին, պետական կառավարման մարմիններին, Կենտրոնական բանկին, արդյունաբերողների և գործարարների միությանը գիտական նստաշրջանին ակտիվ մասնակցություն ցուցաբերելու համար։
Նստաշրջանի բոլոր մասնակիցներին ցանկանում եմ արդյունավետ ու արգասաբեր աշխատանք:
Շնորհակալություն:

Հարգանքով՝ 
ՀՊՏՀ ռեկտոր Կորյուն Աթոյան