Այսօր հայ մամուլի ծննդյան օրն է. նաև՝ մեր մասնագիտական տոնը

Դիտումների քանակ՝ 671

Այսօր  նշվում է հայ մամուլի օրը: 1794 թվականի հոկտեմբերի 16-ին,  հայրենիքից հեռու, Հնդկաստանի հայաշատ Մադրաս քաղաքում Հարություն Շմավոնյանի մեծ ջանքների գնով  ծնվեց հայ մամուլի առաջնեկը` «Ազդարարը»: Այս իրադարձությամբ մի նոր ու նշանակալի էջ բացվեց` վկայելով  մշակութային ու լուսավորչական մեծ նվաճման մասին: Իր նախադեպը չունենալով`«Ազդարարը»  լուսավորող փարոս  դարձավ թե’ պատմական հայրենիքում, թե’ նրանից դուրս  տպագրվելիք մամուլի զարգացման գործում: 

Փոխվեցին ժամանակներն ու ժամանակների հրամայականներով ծնվեցին նոր ազդարարներ, որոնց նպատակը դարձավ «Ազդարարի» գործի ոգեկոչումը, նրա բազում, այսօր էլ դեռ արդիական, ազգասիրական, հայրենասիրական երազանքների իրականացումը: Սակայն հայ մամուլի պատմության մեջ «Ազդարարի» ծննդյան օրը ընդմիշտ դրոշմվեց` նորովի իմաստավորվելով ու արժեվորվելով. 2004 թվականից  հոկտեմբերի 16-ը ՀՀ կառավարության որոշմամբ նշվում  է որպես հայ մամուլի օր:

Հայ մամուլը` իր փոքր ու մեծ պարբերականներով, իր չափով ու իր տեղում արժեքավոր ու եզակի աղբյուր է, որի մեջ արտացոլվում են ժամանակաշրջանի պատմությունը, գաղափարները, հոգսերն ու հիմնախնդիրները, երկրի ու ժողովրդի ներքին կյանքը:

Հայ մամուլի մեծ ընտանիքի մի փոքրիկ մասնիկն է  նաև ՀՊՏՀ լրատվութան և հասարակայնության հետ կապերի բաժնի կողմից լույս ընծայվող բուհի պաշտոնական ամսագիրը՝ «Տնտեսագետը»:  Մենք ևս փորձում ենք քայլել ժամանակին համընթաց` մեր հրապարակումներում արտացոլելով բուհական կյանքին առնչվող բոլոր իրադարձությունները, դառնալով  ՀՊՏՀ գաղափարախոսության ու մշակույթի տարածողը:

ՀՊՏՀ լրատվության և հասարակայնության հետ կապերի բաժինը շնորհավորում է հայ մամուլի մեծ ընտանիքի բոլոր անդամներին, զանգվածային լրատվամիջոցների մեր գործընկերներին մասնագիտական տոնի առթիվ, ցանկանում ստեղծագործական կամք ու անկոտրում ոգի:

 ՀՊՏՀ Լրատվության և հասարակայնության հետ կապերի բաժին