Շրջայց՝ ՀՊՏՀ ինֆորմատիկայի և վիճակագրության ֆակուլտետում

Սկսում ենք մեր շրջայցը:

Երկրորդ հարկում, դեկանատին կից` հայտարարությունների ցուցատախտակը հրատապորեն ներկայացնում է ուսանողներին անհրաժեշտ տեղեկությունները: Համաձայն այս ցուցատախտակին փակցված հայտարարության և դեկանի պարզաբանման` կարող ենք ինֆորմատիկայի և վիճակագրության ֆակուլտետի մագիստրատուրայի առաջին կուրսեցիներին կրկին հայտնել, որ իրենց դասերն սկսվելու են սեպտեմբերի 19-ին և ընթանալու են չորեքշաբթի, հինգշաբթի և ուրբաթ` սկսած ժամը 14.05-ից, 6 դասաժամով: 

Շրջայցի ընթացում ֆակուլտետի դեկան Զաքար Կիրակոսյանը ներկայացրեց ուսումնական գործընթացի ընդհանուր պատկերը, ուղղվածությունը, որի նպատակն է պահպանել խիստ կարգապահություն, անխափան ուսումնական գործընթաց: Ֆակուլտետում գործում է ընթերցասրահ, որն ուսանողներին սպասարկում է առաջին անհրաժեշտ մասնագիտական գրականություն և որը , դեկանի հավաստմամբ, շարունակաբար համալրվելու է: 
Մենք ականատես եղանք, որ շինվերանորոգման աշխատանքների մեծ ծավալ է իրականացվում մասնաշենքի 3-րդ հարկում, որտեղ հիմնահատակ նորոգվում են բոլոր 9 լսարանները: Հիմնովին վերանորոգվել է նաև մասնաշենքի մարզադահլիճը, մասնակի նորոգվել են 1-ին և 2-րդ հարկի լսարանները: Ընդհանուր բարենորոգման մեջ չեն անտեսվել նաև բակի, մասնաշենքին հարակից տարածքի բարեկարգումը, կանաչապատումը:
Զաքար Կիրակոսյանը նշեց, որ մեկ շաբաթ անց ավարտված կլինեն շինվերանորոգման աշխատանքները, և ֆակուլտետային կյանքը կընթանա ավելի հարմարավետ պայմաններում:

ՀՊՏՀ Լրատվության և հասարակայնության հետ կապերի բաժին