Գործընկերները մեծարեցին օտար լեզուների ամբիոնի դասախոս Սոնա Հովհաննիսյանին

«Դուք մեր բուհի նվիրյալներից եք, մարդ ու անհատականություն, ով իր ողջ կյանքը նվիրել է երիտասարդ սերնդի կրթման ու դաստիարակման դժվարին, սակայն շնորհակալ գործին: Դուք ոչ միայն ֆրանսերեն եք սովորեցրել, այլև մարդկային Ձեր վեհ կերպարով, Ձեր որդեգրած արժեքային համակարգով սովորեցրել եք լինել կիրթ ու դաստիարակված մարդ, երկրի արժանի քաղաքացի»,- իր խոսքն հղելով հոբելյարին` ասաց ՀՊՏՀ գիտության և արտաքին կապերի գծով պրոռեկտոր Գագիկ Վարդանյանը և ընթերցեց շնորհակալության և երախտագիտության ջերմ խոսքերով համեմված ռեկտոր Կորյուն Աթոյանի ուղերձը: 
Մանկավարժի վեհ ու պատասխանատու գործն այդքան սիրով ու նվիրումով կատարելու և ուսանողների արժանի սերունդներ դաստիարակելու համար Սոնա Հովհաննիսյանին շնորհակալություն հայտնեց և վաստակած հանգիստ մաղթեց արհկոմիտեի նախագահ Գրիգոր Տերտերյանը: Համատեղ անցած ճանապարհից ուշագրավ դրվագներ պատմեց Գրիգոր Կիրակոսյանը:
Սոնա Հովհաննիսյանի անցած ուղին արժևորեցին, անկեղծ մաղթանքներ ու շնորհակալական խոսքեր ասացին գործընկերները`Սուսաննա Չալաբյանը, Ժենյա Մանուկյանը, Լուսինե Կարագուլյանը, Սոնա Թաբաղյանը, Լուսյա Տեր–Սարգսյանը: «Մի ողջ կյանք եմ անցել այս բուհի պատերի ներքո, և այն ինձ համար դարձել է հարազատ տուն, որը երբեք էլ չեմ լքի: Իսկ օտար լեզուների ամբիոնը իմ օազիսն է, որտեղ ոչ միայն աշխատել եմ, այլև հոգեպես հանգստացել, երջանկացել ընկերներիս ու սաներիս հաջողություններով, տխրել, երբ հոգսեր ու դժվարություններ են ծագել: Շնորհակալ եմ բոլորից, բուհի ղեկավարությունից, իմ գործընկերներից, ուսանողներից, որ այսպես գնահատում են ինձ ու իմ կատարած գործը»,-եզրափակելով ցերեկույթը` ասաց Սոնա Հովհաննիսյանը և վստահեցրեց, որ հոգով ու մտքով մշտապես բուհի, հարազատ ամբիոնի հետ է լինելու, օգնելու և աջակցելու է ցանկացած հարցում:

ՀՊՏՀ Լրատվության և հասարակայնության հետ կապերի բաժին