ՀՊՏՀ-ն հյուրընկալել է գերմանական համալսարանի պատվիրակությանը
Հայաստանի պետական տնտեսագիտական համալսարանի և գերմանական Ցվիկաուի կիրառական գիտությունների համալսարանի միջև համագործակցություն հիմնելու նպատակով, փաստահավաք այցի համար, նախորդ տարի նշված համալսարանները համատեղ հայտով դիմել էին Գերմանիայի կառավարության կողմից ֆինանսավորվող DAAD կրթաթոշակին:
Ինչպես հայտնում են ՀՊՏՀ արտաքին կապերի բաժնից գերմանական վերոնշյալ համալսարանի պատվիրակությունը սեպտեմբերի 18-22-ը հյուրընկալվել է ՀՊՏՀ-ում և մի շարք հանդիպումներ ունեցել: Հյուրերը նախ այցելել են ՀՊՏՀ Եղեգնաձորի մասնաճյուղ, հանդիպել տնօրեն Սոս Խաչիկյանի, աշխատակիցների և ուսանողների հետ: Ապա, հաշվի առնելով հյուրընկալված պրոֆեսոր Քրիստիան-Անդրեաս Շումանի գիտական հետաքրքրությունը, պատվիրակությունը հանդիպել է տնտեսական ինֆորմատիկայի և տեղեկատվական համակարգերի ամբիոնի վարիչ Վարդան Սարգսյանի հետ:
Հաջորդ հանդիպումը տեղի է ունեցել ՀՊՏՀ «Ամբերդ» հետազոտական կենտրոնում, որտեղ տնօրեն Արմեն Գրիգորյանը օտարերկրացի գործընկերներին ներկայացրել է կենտրոնի գործունեության հիմնական ուղղությունները: Կենտրոնի հետազոտողները պրոֆեսորներ Քրիստիան-Անդրեաս Շումանի և Ռալֆ Միշել Րոբերի հետ իրենց հետաքրքրող հարցերն են քննարկել:
Այնուհետ գերմանական պավիրակությանը հյուրընկալել է գիտության և արտաքին կապերի գծով պրոռեկտոր Գագիկ Վարդանյանը: Կողմերը քննարկել են փոխգործակցության ուղղությունները, ձևակերպել համագործակցության համաձայնագրի հիմնական դրույթները և նախանշել առաջիկա անելիքները:
Գերմանական պատվիրակությունը և ՀՊՏՀ արտաքին կապերի բաժնի պետ Վարդ Ղուկասյանը հանդիպել են նաև Հայաստանում DAAD-ի գրասենյակի ուսումնական և կրթաթոշակային ծրագրերի ավագ խորհրդատու Մերի Նավասարդյանին: Կողմերը քննարկել են հնարավոր կրթաթոշակները, որոնց ակադեմիական փոխանակումների նպատակով կարող են դիմել գործընկեր բուհերի դասախոսները և ուսանողները:
Լուսանկարները՝ ՀՊՏՀ արտաքին կապերի բաժնից:
ՀՊՏՀ Լրատվության և հասարակայնության հետ կապերի բաժին