Հավաստագիր և գավաթ՝ մեր բուհի ուսանողական խորհրդին
![](https://asue.am/images/1521617881/f10fce2a4fc08afe6e77aca1.jpg)
ՀՊՏՀ ուսանողական խորհրդի ներկայացուցիչները՝ ՈՒԽ–ի «Էկոնոմ պլյուս» ամսագրի խմբագիր Հայկ Բեջանյանն ու ամսագրի ձևավորող Արկադի Սահակյանն այսօր Մխիթար Հերացու անվան պետական բժշկական համալսարանում մրցանակներ են ստացել։ Այս մասին ՀՊՏՀ լրատվության և հասարակայնության հետ կապերի բաժնին հայտնեց հավաստագրով և գավաթով մեզ մոտ եկած Հայկ Բեջանյանը՝ նշելով, որ հավաստագիրը տրվել է ՀՊՏՀ ՈՒԽ–ի «Էկոնոմ պլյուս» ամսագրին՝ որպես «Լավագույն ուսանողական թերթ» անվանակարգում հաղթողի։
Հիշեցնենք, որ Մխիթար Հերացու անվան պետական բժշկական համալարանում մարտի 20-ին բժշկական համալսարանի ուսանողական խորհրդարանի ստեղծման 20-ամյակին նվիրված «Մեդիկուսի օրեր» հոբելյանական միջոցառումների շրջանակում կազմակերպվել էր բուհերի ուսանողական ինքնակառավարման կառույցների ծավալած լրատվական գործունեության ցուցահանդես-մրցույթ, որին մասնակցել են Մ. Հերացու անվան պետական բժշկական, Հայաստանի պետական տնտեսագիտական, Խ. Աբովյանի անվան հայկական պետական մանկավարժական, Երևանի Վ. Բրյուսովի անվան պետական լեզվաբանական, Հայ-ռուսական (սլավոնական) համալսարանների ուսանողական խորհուրդները:
Նախատեսված հինգ անվանակարգերից չորսում` «Լավագույն ուսանողական թերթ», «Լավագույն ինտերնետային կայք», «Լավագույն բացիկ, բուկլետ, հրավիրատոմս», «Ուսանողական գիտական աշխատանքների լավագույն ժողովածու», ՀՊՏՀ ուսանողական խորհուրդը դարձել է հաղթող:
ՀՊՏՀ լրատվության և հասարակայնության հետ կապերի բաժինը շնորհավորում է ուսխորհրդին և մաղթում նորանոր հաջողություններ։
ՀՊՏՀ Լրատվության և հասարակայնության հետ կապերի բաժին