Գիտական միջոցառումների մեկնարկն ազդարարեց լեզուների ամբիոնը. այսուհետ տեղի կունենան ամբիոնային գիտական սեմինարներ

ՀՊՏՀ գիտության և ասպիրանտուրայի բաժնի նախաձեռնությամբ,  ամբիոնային գիտահետազոտական թեմաների  (ներառյալ ԳՊԿ-ի կողմից ֆինանսավորվող դրամաշնորհային ծրագրերը) շրջանակում այսուհետ կանցկացվեն գիտական սեմինարներ: Միջոցառումը մեկնարկեց այսօր, լեզուների ամբիոնի պրոֆեսորադասախոսական անձնակազմի մասնակցությամբ:

Ներկա էին ՀՊՏՀ գիտության և արտաքին կապերի գծով պրոռեկտոր Գագիկ Վարդանյանը, գիտության և ասպիրանտուրայի բաժնի պետ Խորեն Մխիթարյանը, լեզուների ամբիոնի ղեկավար Սուսաննա Չալաբյանը:

Գագիկ Վարդանյանը ողջունեց  նոր նախաձեռնությունը, նշելով, որ այն աննախադեպ է: Պրոռեկտորը շեշտադրեց ՀՊՏՀ-ում գիտահետազոտական բաղադրիչի ամրապնդման կարևորությունը՝ դասախոսներին  հորդորելով ակտիվություն ցուցաբերել  ամբիոնային գիտահետազոտական սեմինարների նկատմամբ:

Այնուհետև խոսքը տրամադրվեց զեկուցողներին. դասախոսներն ընտրել էին հետաքրքիր ու արդիական թեմաներ:

Քրիստինա Թորգոմյանը անգլերենով  ներկայացրեց «Կոմունիկացիոն տեխնոլոգիաների օգտագործումը դասավանդման ընթացքում» զեկուցումը՝ անդրադառնալով դասապրոցեսում ժամանակակից տեխնոլոգիաների կիրառման եղանակներին ու առանձնահատկություններին:

Ականավոր հայ գիտնական, ֆիզիկոս, աստղագետ, գրող, գեղանկարիչ Գրիգոր Գուրզադյանի (1922-2014թթ.)  95-ամյակի առիթով  գրական-վերլուծական հոդված ներկայացրեց բ.գ.թ., դոցենտ Զուխրա Երվանդյանը. «Հայրենիքը և ազգայինը Գ. Գուրզադյանի գեղագիտական համակարգում» զեկուցման մեջ անդրադարձ էր  մեծ գիտնականի հայրենասիրական ստեղծագործություններին, ազգայինի, մայրենի լեզվի, կրթության ու հայրենի բնության հանդեպ նրա անձնաշնորհ վերաբերմունքին:

Հաջորդիվ ռուսերեն բանախոսեցին դոցենտ Էլֆինա Թադևոսյանը՝ «Տնտեսագիտական եզրաբանության համանունների առաջացման ուղիները» և դասախոս Արմինե Գասպարյանը՝ «Լրատվական և մասնագիտական տեքստերի թարգմանության առանձնահատկությունները»  թեմաներով:

Զեկուցումներից հետո ունկնդիրները հանդես եկան դիտարկումներով ու նկատառումներով:

Մեզ հետ զրույցում  Խորեն Մխիթարյանն ասաց, որ այս սեմինարները տեղի են ունենալու ՀՊՏՀ բոլոր ամբիոններում՝ 2017-2018 ուստարվա  ողջ ընթացքում:

Վերջնարդյունքում ակնկալվում է ընտրված թեմաների շուրջ հիմնախնդիրների վերհանում, եզրակացությունների և առաջարկություննների  ներկայացում:

ՀՊՏՀ Լրատվության և հասարակայնության հետ կապերի բաժին