Հայ-ամերիկյան առողջության կենտրոնի բժիշկները հանդիպեցին ՀՊՏՀ կին աշխատակիցների հետ
ՀՊՏՀ նիստերի սրահում «Հայ կինը իրավունք ունի լինելու առողջ և իրազեկված» խորագրով դասախոսությամբ ՀՊՏՀ կանանց հետ այսօրվա հանդիպմանը հանդես եկան գինեկոլոգ Նելլի Ավագյանը և բժիշկ ռադիոլոգ Հովհաննես Վարդևանյանը:
«Կրծքագեղձի քաղցկեղ ախտորոշումը դատավճիռ չէ: Այս հիվանդության պատճառած մահերի քանակն անհամեմատ պակաս կլինի, եթե կանայք պարբերաբար ենթարկվեն կրծքագեղձի կլինիկական քննության»,- ասաց բժիշկ ռագիոլոգ Հովհաննես Վարդևանյանը և հանգամանորեն անդրադարձավ հիվանդության ախտանիշներին, ռիսկային խմբերին: Նա հորդորեց կանանց հետևել կրծագեղձի առողջությանը` կատարելով կրծքի ինքնազննում, անցկացնելով ամենամսյա ստուգումներ մասնագետ բժշկի մոտ և ենթարկվելով մամոգրաֆիկ ստուգման: Բժիշկը մեկ անգամ ևս հիշեցրեց, որ կրծքագեղձի քաղցկեղի վաղ հայտնաբերումը պահպանում է կանանց կյանքը:
Գինեկոլոգ Նելլի Ավագյանը անդրադարձավ արգանդի պարանոցի քաղցկեղին: Նրա ներկայացմամբ` այս հիվանդությունը թեև մեծ տարածում ունի, այնուհանդերձ ժամանակին բուժելու դեպքում ամբողջությամբ կարելի է ազատվել դրանից: Բժիշկը խոսեց նաև ձվարանների և արգանդի քաղցկեղի մասին` կանանց կոչ անելով հետևել առողջությանը, վարել առողջ ապրելակերպ:
Բանախոսները պատասխանեցին ներկաներին հետաքրքրող հարցերին:
ՀՊՏՀ Լրատվության և հասարակայնության հետ կապերի բաժին