Սննդի անվտանգության ապահովման գործում մեծ է երկրի տնտեսական զարգացման գործոնը. Պիպոյան
Այսօր ՀՊՏՀ ուսումնագիտական հանձնաժողովի նախաձեռնությամբ տեղի ունեցավ հերթական «Բաց դասը», որը վարում էր ՀՀ գյուղատնտեսության նախարարության սննդի անվտանգության ծառայության պետի մամուլի խոսնակ Բաբկեն Պիպոյանը:
«Սննդի անվտանգություն ազգային անվտանգության պահպանման կարևորագույն բաղադրիչներից է: Մեր ծառայությունը կոչված է ամեն ինչ անելու, որպեսզի հանրապետությունում արտադրվի և ներմուծվի միայն բարձրորակ և անվտանգ սնունդ»,- ներկայացնելով իրենց գործառույթներն ասաց Բաբկեն Պիպոյանը և ավելացրեց, որ ծառայությունը բաղկացած է երեք տեսչություններից` անասնաբուժական, բուսասանիտարական ու սննդի անվտանգության և որակի: Բանախոսի ներկայացմամբ` տեսչություններից յուրաքանչյուրը վերահսկում է իր բնագավառը`փորձելով կանխարգելել առողջության համար վտանգավոր և անորակ սննդի արտադրությունը և ներկրումը:
Բաբկեն Պիպոյանն ապագա տնտեսագետներին հավաստիացրեց, որ սննդի անվտանգության ապահովման գործում մեծ է երկրի տնտեսական զարգացման գործոնը: Նրա դիտարկմամբ` սննդի անվտանգության ապահովումը շատ թանկ է, և, ցավոք սրտի, ոչ միշտ է հնարավոր վերահսկել բոլոր ցուցանիշները: Մամուլի խոսնակը կարևորեց նաև հանրային իրազեկվածությունը՝ նշելով, որ սննդային թունավորումների 80 տոկոսի մեղավորը այն քաղաքացին է, ով օգտագործում է ժամկետանց սննդամթերք:
Բաբկեն Պիպոյանը հորդորեց յուրաքանչյուրին լինել հետևողական սննդամթերքի ձեռքերման գործում և օգնել իրենց` սննդամթերքի որակն ու անվտանգությունը վերահսկելու դժվարին աշխատանքներում:
Ավարտին` բանախոսը պատասխանեց ուսանողներին հուզող հարցերին:
ՀՊՏՀ Լրատվության և հասարակայնության հետ կապերի բաժին