«Տնտեսագետի» նոր համարը՝ հերոսության, գարնան զարթոնքի ու կյանքի բարենորոգման մասին

Ճանաչենք մեր նորօրյա հերոսներին: Նրանք մեկ տարի առաջ հայրենիքի հանդեպ իրենց զինվորական պարտքն էին կատարում, երբ սկսվեց Քառօրյա պատերազմը և զենքը ձեռքին փորձառություն անցան իրական պատերազմում: Զորացրվելուց հետո շատերը վերսկսել են ուսումնառությունը: ՀՊՏՀ լրատվության և հասարակայնության հետ կապերի բաժինը հրավիրեց նրանց լուսանկարվելու, հայրենանվեր հայորդիների համալսարանական պահոցը կրկին համալրելու և, իհարկե, «Տնտեսագետի» միջոցով ներկայացնելու ու ճանաչելի դարձնելու նրանց: Եվ ահա, ամսագրի էջերում հայրենիքի հանդեպ իրենց պարտքը սրբորեն կատարած ՀՊՏՀ ուսանող-զինվորներն են:

«Ստեղծագործում են ՀՊՏՀ կանայք և աղջիկները» խորագրի ներքո գարնանային տրամադրություն ու հաճելի հույզեր են փոխանցում մեր գործընկերուհիները:

Համալսարանական իրադարձությունների շարքում առանձին անդրադարձներ կան միջբուհական ուսանողական աշխատաժողովին, ՀՊՏՀ-դպրոց համագործակցությանը, Քառօրյա պատերազմին նվիրված հիշատակի միջոցառումներին:

Տնտեսական հետաքրքրական նորություններ են ներկայացված դոցենտ Սամվել Գրիգորյանի բազմաբովանդակ «Տնտեսական խճանկարում»:

Այս համարում կարդացեք նաև ՀՊՏՀ մագիստրանտների  հետազոտությունը Հայաստանում զվարճանքի ծառայությունների շուկայի, ինչպես նաև ուսանողների հոդվածները պարտատոմսերի եկամտաբերության, աշխարհահռչակ բրենդերի վերաբերյալ:

«Լրահոս»-ում կրկին խտացված են համալսարանական իրադարձությունները:

«Վերծանելով արվեստի գաղտնագրերը» խորագրի ներքո դոցենտ Սոֆյա Օհանյանն անդրադառնում է աշխարհաճանաչ Մեծ Բուդդա Մայտրեյայի արձանին ու նրա ստեղծման  ուշագրավ պատմությանը:

«Ամենակարևորի մասին» և «Փորձագիտական հարթակ» խորագրերում հեղինակները պարզաբանում են բջջային հեռախոսների վնասները և կենցաղային թափոնների հիմնախնդիրը:

«Մշտադիտարկում» խորագիրը ներկայացնում է ֆինանսական շուկաների զարգացումները:

«Տնտեսագետի» նոր համարի առանցքային թեմաների մասին այսքանը, ամբողջական բովանդակությանը կարող եք ծանոթանալ այսօրվանից. ուսանողները՝ դիմելով դեկանատներ, ընթերցասրահներ՝ տեղում ընթերցելու համար, իսկ դասախոսները` ամբիոններ: Այս պահին արդեն ամսագիրը տարածվել է ֆակուլտետներով, ամբիոններով, վարչական ստորաբաժանումներով։

Ամսագրի էլեկտրոնային տարբերակին ՀՊՏՀ պաշտոնական կայքում (asue.am) ծանոթացեք հետևյալ հղումով՝  media.asue.am/upload/tntesaget/2017/TERT_2017.2_optimized.pdf:

Մաղթում ենք հաճելի ընթերցում:

ՀՊՏՀ Լրատվության և հասարակայնության հետ կապերի բաժին