ՀՊՏՀ-ում է Պոզնանի տնտեսագիտության և բիզնեսի համալսարանի դասախոս Պավել Կլիբերը
Տնտեսագիտական համալսարանը շարունակում է «Էրազմուս+» ծրագրի շրջանակներում հյուրընկալել գործընկեր համալսարանների ներկայացուցիչներին: Այս օրերին մեզ մոտ է հյուրընկալվել Պոզնանի տնտեսագիտության և բիզնեսի համալսարանի դասախոս Պավել Կլիբերը: Արտաքին կապերի բաժնի նախաձեռնությամբ նա հանդիպումներ է ունեցել «Ամբերդ» հետազոտական կենտրոնի գիտաշխատողների և ֆինանսական ֆակուլտետի ուսանողների, ասպիրանտների և դասախոսների հետ. հետազոտական կենտրոնի աշխատակիցները հյուրի հետ նախանշել են երկու համալսարանների միջև գիտական գործակցության հնարավորությունները, իսկ ֆինանսական ֆակուլտետում Կլիբերը հանդես է եկել «Ֆինանսական մաթեմատիկա» թեմայով դասախոսությամբ, նրան ընդունել և ուրվագծվող համագործակցության շուրջ զրուցել է ֆինանսների ամբիոնի ղեկավար Աշոտ Սալնազարյանը:
Այսօր միջազգային ծրագրերի կենտրոնում ուսանողների և դասախոսների մասնակցությամբ Պավել Կլիբերը ներկայացրեց «Տոկոսադրույքների մոդելավորում» խորագրով դասախոսություն: Արտաքին կապերի բաժնի պետ Վարդ Ղուկասյանը ողջունեց մասնակիցներին և ներկայացրեց հյուրին: Պոզնանի համալսարանի ներկայացուցիչը պատմական համառոտ ակնարկ կատարեց իր բուհի վերաբերյալ, խոսեց օտարերկրյա ուսանողների համար նախատեսված «Ֆինանսական ինժեներինգ» մագիստրոսական կրթական ծրագրի մասին: Իսկ դասախոսության առանցքում էին տոկոսադրույքների էությունը, դրանց մոդելավորման ու ձևակերպման առանձնահատկությունները: Ուսանողներն իրենց հետաքրքրող հարցերն ուղղեցին բանախոսին:
Ինչպես տեղեկացնում են արտաքին կապերի բաժնից՝ Կլիբերը վաղը նախատեսում է դասախոսությամբ հանդես գալ նաև ՀՊՏՀ Գյումրու մասնաճյուղում:
ՀՊՏՀ Լրատվության և հասարակայնության հետ կապերի բաժին