Ռազմահայրենասիրական դաս՝ Եղեգնաձորի մասնաճյուղում

Դիտումների քանակ՝ 2213

ՀՊՏՀ Եղեգնաձորի մասնաճյուղում 2-րդ կիսամյակի մեկնարկը նշանավորվել է ռազմահայրենասիրական միջոցառմամբ. մասնաճյուղի տնօրեն Սոս Խաչիկյանի հրավերով երեկ  բուհում հյուրընկալվել է ՀՀ ՊՆ 4-րդ բանակային կորպուսի հրամանատար, գնդապետ Վալերի Քոչարյանը  և  արիության դաս  վարել, որին մասնակցել են պրոֆեսորադասախոսական անձնակազմի ներկայացուցիչներ, տարբեր կուրսերի ուսանողներ: Այս մասին տեղեկացնում են մասնաճյուղից:

Բանախոսության առանցքում են եղել ազգ-բանակ գաղափարախոսությանը, բանակաշինությանը, տնտեսության զարգացման և բանակի  միջև կապին առնչվող հարցեր: Գնդապետն իր խոսքում ընդգծել է, որ հասարակությունը, հատկապես երիտասարդությունը, պետք է ակտիվորեն ներգրավված լինի բանակաշինության և զինվորի մարտական ոգու բարձրացմանն ուղղված միջոցառումներում: Ելույթում անդրադարձ է եղել պետական քաղաքականության հարցերին, որոնք վերաբերում են օրինակ, ազգ-բանակ համագործակցության զարգացման հեռանկարներին, բանակը որպես տնտեսության շարժիչ ուժ դարձնելու գաղափարին:

Դասի երկրորդ հատվածում ուսանողները հրամանատարին հղել են իրենց հետաքրքրող հարցերը, ապա 4-րդ բանակային կորպուսի գործունեությանը նվիրված ֆիլմ դիտել:

Մեզ հետ զրույցում Սոս Խաչիկյանն ասաց, որ երեկ պայմանավորվածություն է ձեռք բերվել, համաձայն որի՝ մարտ-ապրիլ ամիսներին նախատեսվում է ուսանողների այցելությունը զորամաս: «Արիության դասը նվիրված էր նաև բանակի հոբելյանական տարեդարձին, այս կիսամյակում նախատեսում ենք բանակ-հասարակություն կապի ամրապնդմանը միտված մի շարք միջոցառումներ կազմակերպել»:

Լուսանկարները՝ մասնաճյուղից:

ՀՊՏՀ Լրատվության և հասարակայնության հետ կապերի բաժին