Նոր նախաձեռնություն. ՀՊՏՀ-ում ներդրվում է փաստաթղթաշարժի էլեկտրոնային համակարգ
![](https://asue.am/images/1521871245/d1d7255b289b0b04080152cc.jpg)
Հայաստանի պետական տնտեսագիտական համալսարանը նոր տարին սկսել է նոր նախաձեռնություններով. ՀՊՏՀ-ում ներդրվել է նոր՝ փաստաթղթաշարժի էլեկտրոնային Mulberry համակարգ: Սա ոչ միայն ժամանակի պահանջ է՝ հաշվի առնելով, որ սույն համակարգից օգտվում են պետական շատ մարմիններ, այլև կազմակերպության համար լավ հնարավորություն է՝ ստեղծելու սեփական փաստաթղթերի էլեկտրոնային համակարգը:
Այսօրվանից սկսած՝ երկու օր, համալսարանի աշխատակիցները վերապատրաստման դասընթացներ կանցնեն. համակարգը ներկայացնող Vxsoft ընկերության ուսումնական ծրագրերի ղեկավար Հայկուհի Խաչիկյանը ծանոթացնում է համակարգին, աշխատելու կարգին և հնարավորություններին: Նրա խոսքով՝ Mulberry համակարգը հնարավորություն է տալիս ստեղծելու փաստաթղթերի էլեկտրոնային բազա, կրճատում է ժամանակի, թղթարարության հետ կապված ռեսուրսները:
ՀՊՏՀ տեղեկատվական տեխնոլոգիաների կենտրոնի տնօրեն Սամվել Հովհաննիսյանի խոսքով՝ մեր համալսարանում համակարգի ներդրման նախապատրաստական աշխատանքները վաղուց են սկսվել, այժմ այն պատրաստ է և հասանելի աշխատակիցներին: «Սա ոչ միայն ժամանակի պահանջ է, այլև օպտիմալացնում է թղթաշրջանառության կազմակերպման հետ կապված բոլոր գործընթացները»,- ասաց Սամվել Հովհաննիսյանը:
ՀՊՏՀ Լրատվության և հասարակայնության հետ կապերի բաժին