Պոզնանի տնտեսագիտության և բիզնեսի համալսարանի ներկայացուցիչը՝ ՀՊՏՀ-ում
«Էրասմուս+» ծրագրի շրջանակում ՀՊՏՀ-ն համագործակցում է Պոզնանի տնտեսագիտության և բիզնեսի համալսարանի հետ, որի ներկայացուցիչ, հետազոտական և միջազգային կենտրոնի աշխատակից Ալեքսանդրա Դաջերլինգն այսօր հյուրընկալվել էր մեր համալսարանում: Արտաքին կապերի բաժնի նախաձեռնությամբ միջազգային ծրագրերի կենտրոնում նշված համալսարանի մասին տեղեկատվական հանդիպում էր, որին ներկա էր նաև Հայաստանում «Էրասմուս +»- ի ազգային գրասենյակի ղեկավար Լանա Կառլովան:
Ողջունելով ներկաներին՝ արտաքին կապերի բաժնի պետ Վարդ Ղուկասյանը նշեց, որ Պոզնանի տնտեսագիտության և բիզնեսի համալսարանի հետ ՀՊՏՀ փոխգործակցությունն, իրավամբ, արդյունավետ է, և «Էրասմուս +» ծրագրով մի քանի ուսանող արդեն գտնվել է Լեհաստանում:
Ողջույնի խոսքով հանդես եկավ Լանա Կառլովան, որից հետո Ալեքսանդրա Դաջերլինգը ընդհանուր տեղեկություններ հաղորդեց Պոզնանի տնտեսագիտության և բիզնեսի համալսարանի ֆակուլտետների, առարկայական ծրագրերի, միջազգային կապերի և բիզնես կազմակերպությունների հետ համագործակցությունների և այլնի մասին:
Առանձնահատուկ անդրադարձ եղավ կրեդիտների փոխճանաչման հետ կապված հարցերին: Ալեքսանդրա Դաջերլինգը պատասխանեց ներկաների հարցերին:
Հիշեցնենք, որ 2015-2016 ուստարվանից «Էրասմուս +» ծրագրով արտերկրի գործընկեր համալսարաններում վերապատրաստվում և ուսանում են ՀՊՏՀ դասախոսներ, աշխատակիցներ և ուսանողներ:
ՀՊՏՀ Լրատվության և հասարակայնության հետ կապերի բաժին