ՀՊՏՀ ներկայացուցիչը պարգևատրվել է ԱԺ նախագահի հուշամեդալով

Մեր համալսարանի ֆիզդաստիարակության, ԱԻ և քաղպաշտպանության ամբիոնի ղեկավար, մանկավարժական գիտությունների թեկնածու, դոցենտ  Հովհաննես Գաբրիելյանն  արժանացել է ՀՀ Ազգային ժողովի նախագահի հուշամեդալի՝ համալսարանական սպորտի զարգացման և ուսանողության շրջանում առողջ ապրելակերպի քարոզման համար:

Նշենք, որ Հովհաննես Գաբրիելյանը նաև ՀՀ ուսանողական մարզական ֆեդերացիայի գլխավոր քարտուղարն է, Համալսարանական սպորտի եվրոպական ասոցիացիայի ղեկավար կազմի անդամ և աուդիտոր:

Մեզ հետ զրույցում  ամբիոնի ղեկավարն ասաց, որ նոյեմբերի 10-13-ը աշխատանքային այցով գտնվել է Բելգրադում (Սերբիա) և մասնակցել Համալսարանական սպորտի եվրոպական ասոցիացիայի ղեկավարության նիստին, որտեղ ամփոփվել են 2016 թվականի  համալսարանական մարզական   ձեռքբերումները, ապա  քննարկվել՝  գալիք տարում ուրվագծվող միջոցառումները:

Հիշեցնենք, որ ՀՀ օրենսդիր մարմնի ղեկավար Գալուստ Սահակյանը, նոյեմբերի 10-ին, Երիտասարդության համաշխարհային և Ուսանողների միջազգային օրերի առիթով, քաղաքական և հասարակական կյանքում ակտիվ գործունեություն ծավալելու համար շնորհակալագրերով, պատվոգրերով և հուշամեդալներով պարգևատրել է մի խումբ երիտասարդների:

Շնորհավորում ենք Հովհաննես Գաբրիելյանին և մաղթում նոր ձեռքբերումներ:

ՀՊՏՀ Լրատվության և հասարակայնության հետ կապերի բաժին