«Ուսանողական ամառ-2016» փառատոնում հաղթեց «Քարվաճառ» ջոկատը

Մեր համալսարանի ուսանողական խորհուրդը գեղեցիկ ավանդույթ է ձևավորել՝ ամեն տարի «Տնտեսագետ» մարզաառողջարանում (Դիլիջան) ուսանողների հանգիստը հիշարժան ու հագեցած է դարձնում: ՈւԽ նախաձեռնությամբ այս տարի  օգոստոսի 13-19-ը ուսանողները   համախմբվել էին «Ուսանողական ամառ-2016»  մարզամշակութային փառատոնի շուրջը: Ինչպես ավելի վաղ հայտնելէինք, «Մենք ենք Արցախը» խորագրով փառատոնի մասնակից ջոկատները (ՀՊՏՀ ֆակուլտետները)  կրում էին «Քարվաճառ», «Շահումյան», «Հադրութ», «Մարտակերտ», «Ասկերան», «Մարտունի» անվանումները:

Փառատոնը եզրափակվել է օգոստոսի 19-ին՝ գալահամերգով, և բոլոր մրցույթների հանրագումարով հաղթել է  տնտեսության կարգավորման և միջազգային տնտեսական հարաբերությունների ֆակուլտետի ուսանողներից կազմված «Քարվաճառ» ջոկատը: Այս մասին տեղեկացնում են ուսխորհրդականները:

Գալահամերգի ընթացքում պարգևատրվել են  փառատոնի մարզական խաղերում  և մրցույթներում մրցանակային տեղեր զբաղեցրած ջոկատները, մեդալներն ու պատվոգրերը հանձնել է ՀՊՏՀ Ֆիզդաստիարակության, ԱԻ և քաղպաշտպանության ամբիոնի  դասախոս, «Տնտեսագետ» մարզաառողջարանի պետ  Հակոբ Կյոկչյանը:

Փառատոնը հայրենասիրական, կրթական-ճանաչողական էր, ինչն ուսանողներին հնարավորություն է ընձեռել ստեղծագործաբար հանդես գալու, ներկայացնելու նոր գաղափարներ, նոր մոտեցումներ: Օրինակ, «Շահումյան» ջոկատը  պատրաստել է  «Մենք ենք Արցախը» խորագրին համահունչ  գեղեցիկ տեսահոլովակ, որտեղ միավորվում են Արցախն ու Հայաստանը: Տեսահոլովակը կարող եք դիտել հետևյալ հղումով՝ facebook.com/Asue.Sc/?fref=nf : Ուսանողներն իրենց ելույթներում մեծ ակնածանքով են հիշել Արցախյան քառօրյա պատերազմում ընկած քաջորդիներին:

Լուսանկարները՝ ՀՊՏՀ ՈւԽ-ից:

ՀՊՏՀ Լրատվության և հասարակայնության հետ կապերի բաժին