ՀՊՏՀ-ն ունի QR գրադարան. կայացավ հանդիսավոր բացումը

Դիտումների քանակ՝ 1530

Մեր ուսանողներին այսուհետ ակնթարթորեն հասանելի կլինեն ՀՊՏՀ գրադարանի ամենապահանջված գրքերը. կարիերայի և մարքեթինգի կենտրոնի նախաձեռնությամբ  և «Ucom»  ընկերության աջակցությամբ ՀՊՏՀ-ում  գործում է QR գրադարան, որի հանդիսավոր բացումը կատարվեց այսօր: Արարողությանը ներկա էին ՀՊՏՀ ռեկտոր, պրոֆեսոր Կորյուն Աթոյանը, գիտության և արտաքին կապերի գծով պրոռեկտոր Գագիկ Վարդանյանը, ուսանողների և շրջանավարտների հետ աշխատանքների գծով պրոռեկտոր Սևակ Խաչատրյանը, կարիերայի և մարքեթինգի կենտրոնի պետ Վլադիմիր Գևորգյանը, գլխավոր մասնագետ Գրիշա Ամիրխանյանը, «U com»  ընկերության գործադիր տնօրեն Հայկ Եսայանը, նույն ընկերության աշխատակիցներ, բուհի աշխատակիցներ, ուսանողներ:

Ռեկտորը, պրոռեկտորները ծանոթացան և առաջիններից մեկը փորձարկեցին էլեկտրոնային գրադարանը: Բակում տեղադրված սարքը հնարավորություն է տալիս առկա ցանկից բջջային հեռախոս ներբեռնել գրքի  էլեկտրոնային տարբերակը: QR-ը կոդ է, որը թույլ է տալիս բջջային հեռախոս ներբեռնել գրքի ամբողջական տարբերակը (QR հապավումը նշանակում է արագ պատասխան):

Ուսանողները ռեկտորի հետ զրույցում ասացին, որ  նոր գրադարանը ոչ միայն անհրաժեշտ և օգտակար է, այլև մոտիվացնող, գիրք բեռնելու գործընթացը բավականին գրավիչ է:

Ռեկտոր Կորյուն Աթոյանը նշեց, որ վերջին տարիներին ՀՊՏՀ գրադարանը թվայնացնում է գրքերը  և սա այդ գործի բաղկացուցիչ մասն է, ինչը, միանշանակ կնպաստի  ուսանողների արդյունավետ ուսումնառությանը:

«Եթե նախկինում ուսանողը պետք է գրադարանում երկար ժամանակ անցկացներ որևէ գիրք կարդալու համար, այժմ արդեն կարող է սեփական հեռախոսում ունենալ ամբողջ գիրքը և ցանկացած պահի օգտվել դրանից»,-ասաց ռեկտորն ու հավելեց, որ կարևորվում է համալսարանում նոր տեխնոլոգիաների ներդրումը:

Ուսանողների խանդավառ հետաքրքրությունը չէր դադարում QR գրադարանի նկատմամբ, նրանք շարունակ փորձարկում էին և բացահայտում նոր  գրադարանից օգտվելու կանոնները:

Նշենք, որ այս պահին  ՀՊՏՀ-ն միակ հայաստանյան բուհն է, որն ունի QR գրադարան:

QR գրադարանը գործում է ՀՊՏՀ տարածքում, համապատասխան սարքը տեղադրված է համալսարանի բակում: Արդեն մի քանի օր է՝ դիզայներական հետաքրքիր լուծումներով աչքի ընկնող գրադարանն  ամբողջացնում է ՀՊՏՀ բակի գրավիչ տեսքը:

ՀՊՏՀ Լրատվության և հասարակայնության հետ կապերի բաժին