Ի գիտություն ուսանողների. ՀՊՏՀ ռեկտորատի նիստում քննարկվեց ուսման վարձերի վճարման կարգին վերաբերող հարցը

Այսօր տեղի ունեցավ ՀՊՏՀ ռեկտորատի հերթական նիստը. օրակարգում ընթացիկ մի շարք հարցեր էին, որոնք բարձրացրեցին ֆակուլտետների դեկանները: Այս օրերին ուսանողներին ամենաշատը հետաքրքրող հարցը ուսման վարձի վճարման կարգին էր վերաբերվում: Քննարկվեց և «Կրթության մասին» ՀՀ օրենքի 28-րդ հոդվածի 6-րդ մասին համապատասխան որոշվեց՝ ուսանողները կարող են ուսման վարձը վճարել ըստ կիսամյակների կամ ուսումնական տարվա ամիսների՝ ուսման վարձը հավասարաչափ բաժանելով տվյալ ուսումնական տարվա ամիսների թվին: Պարզաբանվեց, որ ուսանողները կարող են ուսման վարձը վճարել յուրաքանչյուր ամիս (մինչև դեկտեմբեր վճարելով առաջին, իսկ մինչև մայիս՝ վճարելով երկրորդ կիսամյակի վարձերը): Ցանկության դեպքում, ուսանողները կարող են նաև կիսամյակի վարձը վճարել միանգամից:

Ռեկտորի պաշտոնակատար Դիանա Գալոյանը շեշտեց՝ խստորեն հետևել «Կրթության մասին» ՀՀ օրենքի 28-րդ հոդվածի 6-րդ մասի պահանջին և ուսանողներին տեղեկացնել ուսման վարձը վճարելու իրենց իրավունքի մասին, հարկ եղած դեպքում՝ ընդառաջել: Համալսարանի ղեկավարը հիշեցրեց՝ ՀՊՏՀ-ից որևէ ուսանող ուսման վարձը չվճարելու պատճառով դուրս չի մնացել, ուստի այսուհետ ևս հարկավոր է ուսանողներին ընդառաջել և ուսման վարձերի գանձումը իրականացնել պատշաճ և ըմբռնումով՝ չմոռանալով իհարկե օրենքի պահանջը:

Ուսման վարձերի վճարման մանրամասներին և հաշվեհամարին կարող եք ծանոթանալ հետևյալ հղումով:

Հաջորդիվ, դեկանները ներկայացրեցին ռեկտորի պաշտոնակատար Դիանա Գալոյանին ուղղված ՀՊՏՀ ուսանողների դիմումները, անդրադարձ եղավ ընթացիկ այլ հարցերի ևս:

ՀՊՏՀ Լրատվության և հասարակայնության հետ կապերի բաժին