ՀՊՏՀ ուսանողներն այցելել են կոնյակի և շամպայն-գինիների գործարաններ
ՀՊՏՀ ձեռնարկությունների տնտեսագիտություն և կառավարում մասնագիտության 2-րդ կուրսի ուսանողները դեկտեմբերի առաջին տասնյօրյակում այցելել են Երևանի «Արարատ» կոնյակի և շամպայն-գինիների գործարաններ:
Այս մասին լրատվության և հասարակայնության հետ կապերի բաժնին հայտնեցին կուրսղեկ Գայանե Գրիգորյանն ու նույն կուրսի ուսանողները՝ նշելով, որ այցերն իրականացվել են «Արդյունաբերության էկոնոմիկա» առարկայի շրջանակներում: Նախաձեռնությունը սույն առարկայի դասախոս Գայանե Գրիգորյանին ու ամբիոնի լաբորանտ Անահիտ Անտոնյանին է:
Մասնագիտական նշանակության այցերի ընթացքում ուսանողները մանրամասնորեն ծանոթացել են կոնյակի, ինչպես նաև շամպայնի արտադրման՝ մեծ հետաքրքրություն ներկայացնող գործընթացին: Նրանք ականատես են եղել, թե ինչպես է կատարվում արդեն պատրաստի խմիչքի շշալցումը, պիտակավորումը, համտեսել են ֆիլտրման տարբեր փուլեր անցած խմիչքներից, եղել են հնեցման արտադրամասերում, ծանոթացել հնեցման եղանակներին ու ժամկետներին: Այս ամբողջ ընթացքում ուսանողները բազմաթիվ հարցեր են ուղղել տեխնոլոգներին և մյուս մասնագետներին՝ ստանալով իրենց հետաքրքրող տեղեկատվությունը:
Շրջայցերից հետո ուսանողներն իրենց խորին շնորհակալությունն են հայտնել կազմակերպիչներին և գործարանի ողջ անձնակազմին՝ սրտացավ և մասնագիտական մոտեցման համար՝ վստահեցնելով, որ այցերից բավականին տպավորված են, արդյունքում ձեռք են բերել նոր գործնական գիտելիքներ, որոնք հետագայում կկիրառեն մասնագիտական բնագավառում:
Այցելուները տեղեկացնում են, որ նմանատիպ այցերը կարևորվում են թե' ուսանողների, թե' միկրոէկոնոմիկայի և ձեռնարկատիրական գործունեության կազմակերպման ամբիոնի կողմից:
ՀՊՏՀ Լրատվության և հասարակայնության հետ կապերի բաժին