Գթասրտություն՝ առանց սահմանների
ՀՊՏՀ օտար լեզուների ամբիոնի դասախոս Լուսինե Կարագուլյանի նախաձեռնությամբ դեկտեմբերի 19-ին հերթական նյութական աջակցությունն է ցուցաբերվել Բալահովիտում ապրող սոցիալապես անապահով մեկ ընտանիքի: Ինչպես ՀՊՏՀ լրատվության և հասարակայնության հետ կապերի բաժնին տեղեկացրեց Լուսինե Կարագուլյանը, նշված ընտանիքին չորրորդ անգամ են այցելում և նյութական օգնություն ցուցաբերում. սննդամթերք, հագուստ, խաղալիքներ:
«Այս այցելությունը կազմակերպվել է ինֆորմատիկայի և վիճակագրության ֆակուլտետի վիճակագրություն մասնագիտության ուսանողների՝ Անի Սարուխանյանի, Դրաստամատ Մովսիսյանի, Մարիամ Աբրահամյանի, Վահե Ղուկասյանի, Արտաշես Պետրոսյանի, Քրիստինե Կարապետյանի ջանքերով: Նրանց խրախուսել և օգնել են ֆակուլտետի դեկան Մանուկ Մովսիսյանը, դեկանի տեղակալ Փիրուզա Մայիլյանը և մարքեթինգի ամբիոնի դասախոս Ռուզաննա Բադալյանը:
«Նրանք մասնակցել էին անցյալ տարվա այցելություններին, իսկ այս անգամ հենց իրենք էլ նախաձեռնեցին: Ցանկանում եմ մեր գործընկերներին և ուսանողներին տեղեկացնել, որ այս գործընթացը շարունակական է, և մինչև Ամանոր կայցելենք նաև հենակետային դպրոցներ և էլի մի քանի կարիքավոր ընտանիքի»,- մեզ հետ զրույցում ասաց տիկին Կարագուլյանը՝ ավելացնելով, որ մասնակցել ցանկացողները կարող են դիմել անձամբ իրեն:
ՀՊՏՀ Լրատվության և հասարակայնության հետ կապերի բաժին