ՀՊՏՀ-ում 1-ին անգամ անցկացվեց հրաձգության առաջնություն. հայտնի են մրցանակակիրները
Հայաստանի պետական տնտեսագիտական համալսարանի նորաստեղծ հրաձգարանում այսօր անցկացվեց հրաձգության անդրանիկ առաջնությունը: Երեկ մեկնարկած «Ուսանողական աշուն-2015» մարզամշակութային փառատոնի շրջանակներում ուժերը փորձեցին մեր բուհի վեց ֆակուլտետների, ինչպես նաև Երևանի պետական կոնսերվատորիայի ուսանողական թիմերը:
Առաջնության հաղթողը ինֆորմատիկայի և վիճակագրության ֆակուլտետն է, երկրորդ և երրորդ տեղերը, համապատասխանաբար, զբաղեցրել են հաշվապահական հաշվառման և աուդիտի, մարքեթինգի և բիզնեսի կազմակերպման ֆակուլտետները: 1-3 տեղերը զբաղեցրածներն արժանացել են մեդալների և պատվոգրերի, հաղթող ֆակուլտետը՝ նաև գավաթի:
ՀՊՏՀ հրաձգության բաժանմունքի պատասխանատու, ֆիզդաստիարակության, ԱԻ և քաղպաշտպանության ամբիոնի դասախոս Հակոբ Կյոկչյանը մեզ հետ զրույցում նշեց, որ հրաձգության նկատմամբ հետաքրքրությունը մեծ է հատկապես ուսանողուհիների շրջանում:
«Ուրախալի է փաստել, որ հրաձգության առաջնությունն արդեն անցկացվում է սեփական հրաձգարանում: Գործող բաժանմունքի միջոցով զարգացնում ենք մեր ուսանողների հմտությունները. շուրջ 4 տասնյակ ուսանող հրաձգության բաժանմունքի անդամ է»,-ասաց Հակոբ Կյոկչյանը:
Նշենք, որ այսօր կայացան նաև վոլեյբոլի առաջնության խաղերը, որոնք կշարունակվեն մինչև նոյեմբերի 24-ը:
Շնորհավորում ենք մեր հրաձիգներին:
ՀՊՏՀ Լրատվության և հասարակայնության հետ կապերի բաժին