Խորհրդատվություն ուսանողներին՝ Education USA Հայաստան-ի կողմից
ՀՊՏՀ ուսանողական խորհրդի արտաքին կապերի հանձնաժողովի նախաձեռնությամբ այսօր ուսանողների հյուրն էր Միջազգային կրթության ամերիկյան խորհուրդներ ACTR/ACCELS հայաստանյան գրասենյակի ներկայացուցիչ, Education USA Հայաստան կրթական խորհրդատվական կենտրոնի խորհրդատու Շուշաննա Աբովյանը: Բաց դասի կամ շնորհանդեսի ձևաչափում նա ներկայացրեց ԱՄՆ-ում բարձրագույն կրթության հնարավորությունները:
«Մենք պատրաստ ենք ուսանողներին մանրամասն տեղեկատվություն և խորհրդատվություն տալ ԱՄՆ բուհերի բակալավրիատի, մագիստրատուրայի, հետբուհական կրթության համար դիմելու, ընդունվելու ընթացակարգի վերաբերյալ: Մեզ հետ բերել ենք օժանդակ նյութեր՝ գրքեր, ամսագրեր, ստանդարտացված թեստերի նմուշներ, ծալազդեր և պատրաստ ենք պատասխանել նրանց հարցերին»,- մինչ միջոցառումը լրատվության և հասարակայնության հետ կապերի բաժնին տեղեկացրեց Շուշաննա Աբովյանը՝ ավելացնելով, որ իր գործունեության ընթացքում իրենց գրասենյակը իրականացրել է ԱՄՆ կառավարության կողմից հովանավորվող տասնյակ ծրագրեր, այդ թվում՝ կրթական դասընթացներ, որոնք պարբերաբար վարում են ամերիկյան տարբեր բուհերի պաշտոնական ներկայացուցիչները:
Միջոցառմանը մասնակցում էին բակալավրիատի և մագիստրատուրայի ուսանողներ, նրանք ստացան իրենց հետաքրքրող հարցերի սպառիչ պատասխանները:
ՀՊՏՀ Լրատվության և հասարակայնության հետ կապերի բաժին