ՀՊՏՀ-ականները նվաճել են բրոնզե մեդալ. կայացել է ուսանողների 16-րդ հանրապետական մարզական խաղերի հանդիսավոր բացումը (լուսանկարներ)
ՀՀ կրթության և գիտության նախարար Արմեն Աշոտյանի մասնակցությամբ երեկ տեղի է ունեցել Հայաստանի բուհերի ուսանողների 16-րդ հանրապետական մարզական խաղերի հանդիսավոր բացումը և շախմատի առաջնության հաղթողների պարգևատրումը: Նշենք, որ 16-րդ մարզական խաղերը մեկնարկել են մարտի 14-ին՝ շախմատի առաջնությամբ: Առաջնությունը ամփոփվել է երեկ, հաղթած շախմատիստ-մարզիկներին պարգևատրել է ԿԳ նախարարը: Թիմային պայքարում ՀՊՏՀ շախմատի տղաների թիմը զբաղեցրել է 3-րդ մրցանակային տեղը, արժանացել բրոնզե մեդալների և պատվոգրերի:
Անհատական պայքարում 3-րդ տեղը նվաճել է ՀՊՏՀ տնտեսության կարգավորման և միջազգային տնտեսական հարաբերությունների ֆակուլտետի ուսանող Էդուարդ Մկրտչյանը, ով 9 հնարավոր միավորից վաստակել է 7-ը: Մեր աղջիկները թիմային պայքարում զբաղեցրել են 4-րդ հորիզոնականը:
ՀՊՏՀ ֆիզդաստիարակության, ԱԻ և քաղպաշտպանության ամբիոնի դասախոս, շախմատի մարզիչ Լյուդմիլա Հովհաննիսյանը նշեց, որ թե' տղաների, թե' աղջիկների խաղը գոհացուցիչ էր:
«Լարված պայքարում ՀՊՏՀ տղաների թիմը կարողացավ զբաղեցնել 3-րդ մրցանակային տեղը, ինչը ուժեղ մրցակիցների դեպքում լավ արդյունք է: Մեր մասնակցությունը շախմատի առաջնությանը համարում եմ հաջող, առաջիկա մրցումներում կփորձենք է'լ ավելի լավ արդյունքներ արձանագրել»,-ասաց մարզիչը՝ հավելելով, որ դասերից հետո մշտապես անց են կացվում շախմատի պարապմունքներ, ինչn ապահովում է մեր ուսանողների լավ մարզավիճակը:
3-րդ տեղը նվաճած ՀՊՏՀ շախմատի տղաների թիմի կազմն է՝ Մինաս Կապուկչյան, Սերոբ Ղազարյան, Արտյոմ Սուքիասյան, Էդուարդ Մկրտչյան:
ՀՊՏՀ լրատվության և հասարակայնության հետ կապերի բաժնի տեսախցիկն ակնթարթներ է արձանագրել 16-րդ հանրապետական մարզական խաղերի հանդիսավոր բացման և ՀՊՏՀ շախմատիստ-մարզիկների պարգևատրման արարողությունից:
Առաջիկայում, մարզական խաղերի շրջանակներում կկայանան առաջնություններ, այլ մարզաձևերից, մեր մարզիկներին մաղթում ենք հաջող մասնակցություն:
ՀՊՏՀ Լրատվության և հասարակայնության հետ կապերի բաժին