Կոչ եմ անում լուրջ ուշադրություն դարձնել կրթության որակի բարձրացման հարցին. տեղի ունեցավ այս ուսումնական տարվա գիտխորհրդի առաջին նիստը

ՀՊՏՀ նիստերի դահլիճում այսօր տեղի ունեցավ համալսարանի գիտական խորհրդի 2014-2015 ուսումնական տարվա առաջին նիստը՝ գիտխորհրդի նախագահ, ՀՊՏՀ ռեկտոր Կորյուն Աթոյանի գլխավորությամբ:

Ուսումնակազմակերպական աշխատանքների գծով պրոռեկտոր Միհրդատ Հարությունյանը ներկայացրեց օրակարգի առաջին հարցը՝ 2013-2014 ուսումնական տարվա երկրորդ կիսամյակի քննաշրջանի արդյունքները՝ նշելով, որ տվյալ կիսամյակի ընթացքում ռեկտորատը, դեկանատները և ամբիոնները բավական աշխատանք են կատարել գործընթացը պատշաճ կազմակերպելու, ինչպես նաև ուսումնական գործընթացում նկատված թերությունները շտկելու և կրթական բարեփոխումները նոր մակարդակի հասցնելու, ուսումնական և կատարողական կարգապահությունը բարձրացնելու ուղղությամբ: Պրոռեկտորը մանրամասն ներկայացրեց առկա և հեռակա բակալավրիատում և մագիստրատուրայում քննաշրջանից հետո արձանագրված  ուսման առաջադիմության պատկերը, մանրամասնեց թերությունները և չլուծված խնդիրները:

Միհրդատ Հարությունյանը գիտխորհրդին ներկայացրեց նաև ավարտական աշխատանքների, մագիստրոսական թեզերի պաշտպանության և ամփոփիչ ատեստավորման քննությունների արդյունքները՝ նախ ընդգծելով, որ գործընթացն իրականացվել է սահմանված ժամանակահատվածում, ՀՀ  կրթության և գիտության նախարարի հրամանի պահանջներին համապատասխան: Պրոռեկտորի տեղեկացմամբ՝ 2013-2014 ուսումնական տարում համալսարանն ունեցել է առկա ուսուցման բակալավրիատի 1148, հեռակա ուսուցման բակալավրիատի 425 և առկա մագիստրատուրայի 666 շրջանավարտներ, որոնց համար կազմակերպվել են ավարտական աշխատանքների, մագիստրոսական թեզերի պաշտպանության և ամփոփիչ ատեստավորման քննություններ: Գիտխորհուրդն ընդունեց ներկայացված երկու հարցերի շուրջ հաշվետվությունները և որոշումները:

«Հարգելի գործընկերներ, առաջին հերթին խոսքս ուղղում եմ ամբիոնների վարիչներին, ցանկանում եմ նշել, որ կրթության որակն այսօր մեզ չի բավարարում: Բոլորիդ կոչ եմ անում լուրջ ուշադրություն դարձնել կրթության որակի բարձրացման հարցին, այս ուղղությամբ լուրջ քայլեր ձեռնարկել, ներկայացնել առաջարկներ»,- վերը նշված երկու հարցերի ներկայացումից հետո հայտարարեց ՀՊՏՀ ռեկտոր Կորյուն Աթոյանը: Դրանից հետո ռեկտորը գիտխորհրդի հաստատմանը ներկայացրեց գիտական խորհրդի 2014-2015 ուսումնական տարվա առաջին կիսամյակի աշխատանքային պլանը, որը հաստատվեց:

Ընթացիկ հարցերի շարքում գիտության և արտաքին կապերի գծով պրոռեկտոր Գագիկ Վարդանյանը զեկուցեց ատենախոսությունների թեմաներ և գիտական ղեկավարներ հաստատելու մասին մի շարք հարցեր:  Գիտխորհուրդը հրատարակության երաշխավորեց մակրոէկոնոմիկայի ամբիոնի կողմից ներկայացված «Տնտեսության պետական կարգավորում» ուսումնական ձեռնարկն ու ֆիզդաստիարակության, արտակարգ իրավիճակների և քաղպաշտպանության ամբիոնի դասախոս Հակոբ Կյոկչյանի «Մարզական խաղերը բուհում» ուսումնական ուղեցույցը:

ՀՊՏՀ Լրատվության և հասարակայնության հետ կապերի բաժին