ՀՊՏՀ ներկայացուցիչները հերթական անգամ այցելեցին դպրոցներ
Վաղ առավոտից մի խումբ ՀՊՏՀ-ականներ բուհից ուղևորվեցին Արմավիրի մարզ՝ դպրոցների հետ համագործակցության ծրագրի շրջանակներում հերթական հանդիպումներն ունենալու Արմավիրի թիվ 1 և Վաղարշապատի թիվ 10 ավագ դպրոցների աշակերտների հետ: Օտար լեզուների ամբիոնի դասախոս, նշված ծրագրի ղեկավար Լուսինե Կարագուլյանը, կառավարչական հաշվառման և աուդիտի ամբիոնի ասիստենտ Տիգրան Մանուկյանը, տնտեսագիտության տեսության ամբիոնի դոցենտ Մուշեղ Հակոբյանը, ՈւԽ նախագահ Սևակ Խաչատրյանը և մի խումբ ուսանողներ նշված դպրոցներում ներկայացրել են ՀՊՏՀ-ն, պատասխանել աշակերտների հարցերին: Հանդիպումը, մասնավորապես, եղել է տնտեսագիտական հոսքի ավագ դասարանների հետ: Մեր բուհի ներկայացուցիչները աշակերտներին տրամադրել են բուհի, ուսխորհրդի մասին տեղեկատվական գրքույկներ, նվիրել մեր ամբիոնների կողմից թողարկված մասնագիտական գրքեր, բուհի պաշտոնական ամսագրի՝ «Տնտեսագետի» օրինակներ : Ուսանողները լուսապատկերի միջոցով ներկայացրել են բուհը՝ ֆակուլտետները, մասնագիտությունները, պաշտոնական կայքը, համալսարանի արտաքին տեսքը, բակը և այլն:
Ինչպես ՀՊՏՀ լրատվության և հասարակայնության հետ կապերի բաժնին փոխանցեց Լուսինե Կարագուլյանը, աշակերտները հետաքրքրված են Տնտեսագիտական համալսարանով, նրանցից շատերն արդեն հստակ կողմնորոշվել են Տնտեսագիտական մայր հալմալսարանում կրթություն ստանալու հարցում:
«ՀՊՏՀ-ն համագործակցում է հայաստանյան 12 ավագ և միջնակարգ դպրոցների, ինչպես նաև մի քանի քոլեջների հետ և սա համագործակցության շրջանակներում հերթական այցն էր: Մեր հիմնական նպատակն էր տնտեսագիտական բարձրագույն կրթություն ստանալ ցանկացող աշակերտների մոտ բարձրացնել տեղեկացվածությունը, օգնել նրանց կողմնորոշվելու և պատասխանել հետաքրքրող հարցերին: Նշենք, որ նաև քայլեր են ձեռնարկվում լավ սովորող, սոցիալապես անապահով աշակերտներին նյութական օժանդակություն ցուցաբերելու համար (մի քանի անգամ այսպիսի ծրագիր իրականացվել է)»,-ասաց Լուսինե Կարագուլյանը՝ ընդգծելով, որ իրենց այցից աշակերտները բավականին ոգևորված էին:
Ծրագրի ղեկավարը նշեց նաև, որ այցերը շարունակական են: Առաջիկայում վերոնշյալ դպրոցի աշակերտները կայցելեն ՀՊՏՀ: Լուսինե Կարագուլյանը շնորհակալություն հայտնեց բուհի ղեկավարությանը՝ ի դեմս Կորյուն Աթոյանի՝ աջակցության համար:
ՀՊՏՀ Լրատվության և հասարակայնության հետ կապերի բաժին