Աշխատաժողով ՀՊՏՀ-ում՝ «Արարատ» ծրագրի շրջանակներում
Տեմպուսի «Արարատ» ծրագրի շրջանակներում ՀՊՏՀ-ում ընթանում է ոլորտային որակավորումների շրջանակներին (բնութագրիչներին) նվիրված եռօրյա աշխատաժողով, որը մեկնարկել է երեկ՝ մարտի 17-ին: Աշխատաժողովին մասնակցում են ՀՊՏՀ որակի ապահովման բաժնի պետ, «Արարատ» ծրագրի համակարգող Ներսես Գևորգյանը, բաժնի աշխատակիցները, ծրագրի շահառուները:
Կարևորելով Հայաստանի Հանրապետության բարձրագույն կրթության համակարգի արդյունավետության բարձրացման և ընթացող բարեփոխումների իրականացման գործընթացը՝ «Արարատ» ծրագրի համակարգողները նշված քննարկումների համար հրավիրել են ոլորտի փորձագետ Սթիվեն Ադամին. վերջինս աշխատաժողովների ընթացքում հանդես է գալիս խորհրդատվությամբ: Քննարկումներին մասնակցում են ծրագրի բոլոր գործընկերները՝ կրթության, տեղեկատվական տեխնոլոգիաների և կառավարման ոլորտների աշխատանքային խմբերով։
Հիշեցնենք, որ ՀՊՏՀ-ն Տեմպուսի «Արարատ» ծրագրի համակարգողն է:«Արարատ»ծրագիրը եռամյա է և նպատակաուղղված է համալսարան–գործատու կապերի ստեղծմանն ու ամրապնդմանը։ Ծրագրի գերնպատակն է կրթության բոլոր շահակիցների հետ աշխատելով՝ ապահովել կրթության և աշխատաշուկայի կապը և իրականացնել կրթական բարեփոխումներ՝ հիմնվելով աշխատաշուկայի պահանջների վրա: Կմշակվեն ուսումնառության վերջնարդյունքներ մի շարք մասնագիտությունների և առարկայական ոլորտների համար, կհրապարակվեն ուսումնամեթոդական ուղեցույցներ: Արտասահմանում կվերապատրաստվեն ՀՊՏՀ աշխատակիցներ:
Մանրամասն ծրագրի մասին հետևյալ հղումով՝ www.ararattempus.org
Աշխատաժողովը կամփոփվի վաղը՝ մարտի 19-ին:
ՀՊՏՀ Լրատվության և հասարակայնության հետ կապերի բաժին