«Ամբերդում» կայացավ ՀՊՏՀ առաջին մագիստրոսական խմբի հետազոտական աշխատանքի շնորհանդեսը. «ուղեղային կենտրոնները»՝ ուսումնասիրության առարկա (լուսանկարների ալբոմ)
![](https://asue.am/images/1523342175/105d9b7d362de1de4fccdb08.jpg)
ՀՊՏՀ «Ամբերդ» հետազոտական կենտրոնում այսօր տեղի ունեցավ մեր համալսարանի երիտասարդ հետազոտողների (մագիստրոսական խմբի) կատարած հետազոտության շնորհանդեսը՝ «Արտասահմանյան առաջատար համալսարանական «ուղեղային կենտրոնների» գործունեության ուսումնասիրությունն ու լավագույն փորձի ներդրման հնարավորությունները ՀՀ-ում» թեմայով:
Շնորհանդեսին մասնակցում էին ռեկտոր, պրոֆեսոր Կորյուն Աթոյանը, գիտության և արտաքին կապերի գծով պրոռեկտոր Գագիկ Վարդանյանը, «Ամբերդ» հետազոտական կենտրոնի տնօրեն Սամվել Ավետիսյանը, կենտրոնի աշխատակազմը:
Բացման խոսքով հանդես եկավ Սամվել Ավետիսյանը՝ նշելով, որ սա մեր համալսարանի 1-ին մագիստրոսական հետազոտական խմբի կատարած աշխատանքների ամփոփ ներկայացումն է, խմբում ներգրավված է 6 մագիստրանտ, ովքեր աշխատել են «Ամբերդ» հետազոտական կենտրոնի «Ազգային անվտանգության հետազոտությունների ծրագրի» տնօրեն, տ.գ.թ. Վարդան Աթոյանի ղեկավարությամբ:
![](https://asue.am/images/1523342175/3449caa686e4a14977bedf7b.jpg)
Հետազոտությունը լուսապատկերի միջոցով ներկայացրեց ՏԿ և ՄՏՀ ֆակուլտետի մագիստրատուրայի 2-րդ կուրսի ուսանողուհի Ստելլա Հովսեփյանն, ով ներկայացրեց իրենց խմբի կատարած հետազոտությունը՝ միջազգային ուղեղային կենտրոններին (ՈՒԿ) բնորոշ հիմնական հատկանիշների, դրանց գործունեության, առաքելության, նպատակների, հետազոտությունների թեմատիկ ուղղվածությունների, կանխատեսումների մեթոդաբանության, ֆինանսավորման, հրապարակումների, աշխատակազմերի կառուցվածքների և այլ հարցերի մասին: Վերջում անդրադարձ եղավ նաև հայաստանյան համալսարանական հետազոտական կենտրոններին: Հետազոտության արդյունքում ուսանողները ներկայացրեցին առաջարկություններ՝ արտասահմանյան առաջավոր փորձը Հայաստանի համալսարանական ՈւԿ-ներում, այդ թվում՝ ՀՊՏՀ «Ամբերդ» հեռազոտական կենտրոնում ներդնելու համար:
Շնորհանդեսի ավարտին ծավալվեց քննարկում, հնչեցին մի շարք հարցադրումներ՝ ինչպես ռեկտորի և պրոռեկտորի, այնպես էլ հետազոտական կենտրոնի տնօրենի կողմից: ՀՊՏՀ ռեկտոր Կորյուն Աթոյանը մի քանի հարցեր ուղղեց ուսանողներին՝ հետաքրքրվելով մի շարք խնդիրների մասին, իսկ վերջում ճշգրտեց, թե ՀՊՏՀ նորաստեղծ կենտրոնում ուսանողների կողմից կատարված առաջին հետազոտությունն ինչ տվեց մագիստրանտներին, ինչին ի պատասխան ուսանողներն արձագանքեցին, թե նախ՝ սա լավ փորձ էր իրենց համար, հետո նաև՝ կողմնորոշիչ. ուսանողներից ոմանք մտադիր են շարունակել իրենց հետագա ճանապարհը գիտահետազոտական ոլորտում: «Առանց հետազոտական աշխատանքների, առանց այս ուղղության զարգացման համալսարանները չեն կարող զարգանալ, սա է ճիշտ ճանապարհը»,- իր խոսքն ամփոփեց բուհի ղեկավարն ու հույս հայտնեց, որ մագիստրանտների աշխատանքի այս փորձը վարակիչ կլինի, և հետզհետե ավելի մեծ թվով ուսանողներ կընդգրկվեն կենտրոնի հետազոտական աշխատանքներում: Միջոցառման վերջում ռեկտորը ուսանողներին հանձնեց մասնակցության վկայականներ:
Հետազոտական խմբի ղեկավարին՝ «Ամբերդ» հետազոտական կենտրոնի «Ազգային անվտանգության հետազոտությունների ծրագրի» տնօրեն, տ.գ.թ. Վարդան Աթոյանին խնդրեցինք գնահատել կատարված աշխատանքը՝ ուսանողներին հետազոտական աշխատանքներում ներգրավելու մշակույթի ստեղծման համատեքստում: Ի պատասխան՝ խմբի ղեկավարը նշեց. ««Ամբերդ» հետազոտական կենտրոնի կողմից իրականացվող հետազոտական ծրագրերում մագիստրանտների ներգրավումը բխում է մեր Կենտրոնի ռազմավարությունից: Հիմա արդեն կարող ենք արձանագրել, որ այս ուղղությամբ առաջին արդյունավետ քայլերն արդեն իրականացվել են և աստիճանաբար ստանում են ինստիտուցիոնալ բնույթ: Մենք մտադիր ենք շարունակել այս ուղղությամբ աշխատանքները՝ աստիճանաբար մեծացնելով հետազոտական գործունեության մեջ ընդգրկված ուսանողների շրջանակը»:
Վերջում Վարդան Աթոյանը մագիստրանտներին նվիրեց նաև իր հեղինակած գրքերից մեկը:
Հիշեցնենք, որ նույն խմբին անդրադարձել էինք նաև մեր նախորդ հրապարակումներում, որոնց կարող եք ծանոթանալ հետևյալ հղումներով՝ http://www.asue.am/am/էջեր-220//միջազգային-ուկ-ների-գործունեության-առանցքները-ամբերդի-երիտասարդ-հետազոտողների-դիտակետում-1281, http://www.asue.am/am/էջեր-220//ուսանողների-մասնակցությամբ-հետազոտական-ծրագրի-մեկնարկ-ամբերդ-կենտրոնի-կողմից-1208:
Հ.Գ. Լուսանկարներն այստեղ՝ http://www.asue.am/am/էջեր-220//արտասահմանյան-առաջատար-համալսարանական-ուղեղային-կենտրոնների-գործունեության-ուսումնասիրությունն-ու-լավագույն-փորձի-ներդրման-հնարավորությունները-հհ-ում-թեմայով-հետազոտության-շնորհանդես-1368
ՀՊՏՀ Լրատվության և հասարակայնության հետ կապերի բաժին