«ՀՀ-ում վենչուրային կապիտալի ձևավորման և շրջանառության հիմնախնդիրները» խորագրով բաց դաս՝ ՀՊՏՀ-ում

ՀՊՏՀ մակրոէկոնոմիկայի ամբիոնի նախաձեռնությամբ  այսօր մագիստրատուրայի 1-ին կուրսի մակրոտնտեսական վերլուծություն մասնագիտացման ուսանողների մասնակցությամբ կազմակերպվել էր բաց դաս: Ուսանողները դասի ընթացքում քննարկեցին  «ՀՀ-ում  վենչուրային կապիտալի ձևավորման և շրջանառության հիմնախնդիրները»  թեման:

Մագիստրանտները շնորհանդեսի տեսքով ներկայացրեցին և վերլուծեցին «Վենչուրային հիմնադրամների դերը ազգային ինովացիոն համակարգի ստեղծման մեջ», «Վենչուրային կապիտալ», «Վենչուրային հիմնադրամների էությունը, դերն ու նշանակությունը», «Վենչուրային հիմնադրամների էությունը, դերն ու նշանակությունը», «Վենչուրային ներդրողների գործունեության կազմակերպումը», «ՀՀ-ում վենչուրային կապիտալի ձևավորման փորձը» և այլ թեմաներ:

Դասի կազմակերպիչ, վորոնշյալ ամբիոնի դասախոս, տ.գ.թ., դոցենտ  Ծովինար Կարապետյանը մեզ հետ զրույցում նշեց, որ մագիստրանտների կողմից մեծ է հետաքրքրությունը բաց դասերի նկատմամբ, քանի որ դրանք հնարավորություն են տալիս նրանց կատարել ինքնուրույն աշխատանք և վերլուծել այն: Դասախոսը կարևորեց նաև բանավոր հաղորդակցության, սեփական կարծիքն արտահայտելու  և հիմնավորելու մշակույթի զարգացումը,  որին նպաստում են բաց դասերը:

Մագիստրանտները նշեցին, որ բաց դասի թեման հետաքրքիր է  և քննարկման կարիք ունի: «Կարևորում եմ բաց դասերի միջոցով  երկրի տնտեսության համար կարևոր թեմաների համընդհանուր  քննարկումը: Վերլուծելով  և  քննարկելով միջազգային փորձը, հատուկ մեթոդաբանությունն ու մեխանիզմները՝ կարելի է այն օգտագործել մեր երկրի զարգացման համար»,-ասաց ուսանող  Անի Հունանյանը:

«Բաց դասերը հնարավորություն են տալիս ավելի մանրամասն ուսումնասիրել կարևոր թեմաներ, հանդես գալ սեփական վերլուծությամբ և կարծիքով, լսել նաև այլոց կարծիքները և պարզաբանել դրանք»,- հավելեց մագիստրանտ Հեղինե Օհանյանը:

ՀՊՏՀ Լրատվության և հասարակայնության հետ կապերի բաժին