Կայացավ ՀՊՏՀ «Ուսանողական աշուն» մարզամշակութային փառատոնի բացման հանդիսավոր արարողությունը

ՀՊՏՀ մարզադահլիճում ռեկտոր Կորյուն Աթոյանի մասնակցությամբ այսօր տեղի ունեցավ «Ուսանողական աշուն 2013» –ի հանդիսավոր բացումը: ՀՊՏՀ լավագույն  մարզիկները  շքերթով մուտք գործեցին մարզադահլիճ՝ազդարարելով մարզամշակութային փառատոնի հանդիսավոր բացումը: Ֆիզդաստիարակության, ԱԻ և ՔՊ ամբիոնի   վարիչի ժ/պ, մարզական խաղերի գլխավոր մրցավար Սիմոն Հակոբյանը  զեկուցեց,  որ  «Ուսանողական աշուն» մարզական խաղերի մասնակիցները պատրաստ են բացմանը, այնուհետև  խոսքը փոխանցեց Կորյուն Աթոյանին:

«Սիրելի ուսանողներ, հարգելի գործընկերներ,սրտանց ողջունում  եմ  մեր համալսարանի ավանդական դարձած, ամենամյա «Ուսանողական աշուն»  մարզամշակութային փառատոնի բացման կապակցությամբ:  Ուսանողները, բացի իրենց հիմնական գործառույթից՝ սովորելուց, պետք է ընդգրկված լինեն նաև նման նախաձեռնություններում, ինչը հիշարժան կդարձնի ուսանողների կյանքը: Ցանկանում եմ, որ այստեղ ևս իշխի արդարությունը և հաղթի ուժեղագույնը»,- ասաց Կորյուն Աթոյանը՝ համալսարանական- ուսանողական կյանքը բազմաբովանդակ դարձնելու առումով կարևորելով ուսանողների մասնակցությունը  նմանատիպ միջոցառումներին:

Մասնակիցներին ողջունեցին  նաև ուսանողական խորհրդի նախագահ Սևակ Խաչատրյանը և ՀՀ ուսանողական ֆեդերացիայի նախագահության անդամ Հովհաննես Գաբրիելյանը, ով հրավիրվել էր ուսխորհրդի կողմից:

Սիմոն Հակոբյանը ներկայացրեց ՀՊՏՀ  2013 թ. լավագույն մարզիկներին (ռեկորդակիրներին) , որոնցից շատերն առաջատար են ոչ միայն բուհում, այլև աշխարհի չեմպիոններ, եվրոպական մրցաշարերի հաղթողներ, ՀՀ բազմակի չեմպիոններ  են (Հրանտ Հայրապետյան, Հայկ Ամիրխանյան, Լուսինե Իսկանդարյան,Նարե Հովհաննիսյան և ուրիշներ): Այնուհետև հնչեց Հայաստանի օրհներքը, որի ներքո  բարձրացավ  հայոց եռագույնը:

Հանդիսավոր բացմանը հաջորդեց միջֆակուլտետային ֆուտբոլային խաղը՝ հաշվապահական հաշվառման և աուդիտի և ՏԿ և ՄՏՀ ֆակուլտետների միջև:

Խաղն ավարտվեց 10-6 հաշվով՝ հօգուտ հաշվապահական հաշվառման և  աուդիտի ֆակուլտետի:

Ինչպես լրատվության և հասարակայնության  հետ կապերի բաժնին տեղեկացրեց  գլխավոր մրցավարը՝ թիմերում խաղում էին ՀՀ բուհական մրցումների չեմպիոններից շատերը (ՀՊՏՀ ֆուտբոլային թիմը չեմպիոն է), ուստի պայքարը թեժ էր:

Նշենք, որ խաղացող թիմերին ակտիվորեն երկրպագում էին ուսանողները, ինչպես նաև հաշվապահական հաշվառման և աուդիտի ֆակուլտետի դեկան  Աշոտ Մաթևոսյանը:

Տեղեկացնենք նաև, որ փառատոնի շրջանակներում միջֆակուլտետային ֆուտբոլային խաղերը կշարունակվեն մինչև այս շաբաթվա վերջ:

Թիմերին մաղթում ենք հաջողություն:

ՀՊՏՀ Լրատվության և հասարակայնության հետ կապերի բաժին