Քննարկվեցին ՀՀ պետական կառավարման և տեղական ինքնակառավարման զարգացման հիմնախնդիրները

ՀՊՏՀ «Ամբերդ»  հետազոտական կենտրոնում հերթական գիտական սեմինարը «Պետական  կառավարում  և  տեղական  կառավարում»  ուղղության  շրջանակներում էր` «Պետական  կառավարման  և  տեղական  ինքնակառավարման զարգացման հիմնախնդիրները ՀՀ-ում» խորագրով: Այսօր կայացած սեմինարին մասնակցում էին գիտության և արտաքին կապերի գծով պրոռեկտոր Գագիկ Վարդանյանը, «Ամբերդ»  հետազոտական կենտրոնի տնօրեն Սամվել Ավետիսյանը և  աշխատակազմը, դասախոսներ, ասպիրանտներ:

Հետազոտական ուղղության ղեկավար, ՀՊՏՀ կառավարման ամբիոնի վարիչ, ՀՀ ԳԱԱ ակադեմիկոս Յուրի Սուվարյանն իր ներածական խոսքում թեմայի արդիականությանն ու կարևորությանն անդրադարձավ մի փոքր պատմական էքսկուրսով` նշելով, որ իր գոյության շուրջ 5000-ամյա պատմության ընթացքում մեր երկիրը  1650 տարի է պետականություն ունեցել և, ցավոք, այդ ժամանակահատվածը համարժեք չէ մեր ժողովրդի ներուժին: Նա նշեց, որ «Պետական  կառավարման  և  տեղական  ինքնակառավարման զարգացման հիմնախնդիրները ՀՀ-ում» ուսումասիրությամբ իրենց հետազոտական խումբը փորձում է վերլուծել, գնահատել այսօրվա պետական կառավարման համակարգը, բնութագրել արդյունավետությունը, և, եթե հնարավորություն ընձեռվի հետազոտությունը շարունակելու, հաջորդ փուլում ներկայացնել իրագործման արժանի առաջարկություններ, բարեփոխումներ:

Այնուհետև Յուրի Սուվարյանը խոսքը տրամադրեց սեմինարի բանախոսին` տնտեսագիտության թեկնածու, կառավարման ամբիոնի դոցենտ Ռուբեն Հայրապետյանին, ով հանգամանորեն անդրադարձավ Հայաստանի Հանրապետության տեղական  ինքնակառավարման  հիմնախնդիրներին, որից հետո բանախոսին ուղղվեցին հարցեր:

«Այս թեման կարևոր է առնվազն երկու առումով, նախ` որ պետական կառավարման և տեղական ինքնակառավարման համակարգերը դառնան ավելի արդյունավետ և երկրորդ` ստեղծվի հանրային կառավարման պետական այնպիսի համակարգ, որ բացառվի պետականության կարուստը և ապահովվի Հայաստանի երրորդ Հանրապետության վերընթաց զարգացման ճանապարհը»,- սեմինարի ավարտին լրատվության և հասարակայնության հետ կապերի բաժնի հետ զրույցում ասաց Յուրի Սուվարյանը:

«Ամբերդ» հետազոտական կենտրոնի տնօրեն Սամվել Ավետիսյանը քննարկվող թեման գնահատեց կարևոր և հրատապ` նշելով, որ դրա շահառուն բոլորս ենք,  և հետևաբար ակնկալվում է հետազոտական աշխատանքի համակողմանի և շոշափելի արդյունք:

ՀՊՏՀ Լրատվության և հասարակայնության հետ կապերի բաժին