ՀՊՏՀ անգլերենի 14 մասնագետներ ստացել են հավաստագրեր Մեծ Բրիտանիայի Քեմբրիջի համալսարանից
Հայաստանի պետական տնտեսագիտական համալսարանում կրթական գործընթացի որակական բարելավման տեսանկյունից կարևոր նշանակություն ունեն պրոֆեսորադասախոսական կազմի պարբերաբար կազմակերպվող վերապատրաստումները: Համալսարանի միջազգայնացման, ինչպես նաև մրցունակ մասնագետների պատրաստման գործում մեծ է օտար լեզուների իմացությունը: Այս համատեքստում կարևոր քայլ էր Բրիտանական խորհրդի հայաստանյան մասնաճյուղի կողմից ՀՊՏՀ-ում կազմակերպված անգլերենի դասընթացները:
Օրերս ՀՊՏՀ օտար լեզուների ամբիոնի անգլերենի 14 մասնագետներ Մեծ Բրիտանիայի Քեմբրիջի համալսարանից ստացել են հավաստագրեր` «BEC Business English Certificate», որը հնարավորություն է տալիս նրանց դասավանդելու գործարար անգլերեն տնտեսագիտական բուհերում: Այս մասին մեզ հայտնեց ՀՊՏՀ օտար լեզուների ամբիոնի վարիչ Սուսաննա Չալաբյանը: Վերջինս նշեց, որ իրենք ստացել են նաև դասընթացից առաջ կազմակերպված` բոլոր մասնակիցների անգլերենի ընդհանուր գիտելիքների ստուգման մասին վկայող` «APTIS» հավաստագրեր:
«Բրիտանական խորհրդի հայաստանյան մասնաճյուղի կողմից մեր բուհում անցկացվել են դասընթացներ, որոնք տևել են 2 ամիս` 2012 թ. հոկտեմբերի 25-ից մինչև դեկտեմբերի 22-ը: Այնուհետև մասնակիցները մարտի 16-ին հանձնել են բանավոր, իսկ 22-ին` գրավոր քննություններ: Արդյունքներն ուղարկվել են Քեմբրիջի համալսարան, որտեղ էլ իրականացված ստուգումից ու գնահատումից հետո, մենք ստացել ենք «BEC Business English Certificate» հավաստագրերը»,- լրատվության և հասարակայնության հետ կապերի բաժնի հետ զրույցում ասաց Սուսաննա Չալաբյանը: Վերջինս, գիտնական մանկավարժի համար կարևորելով այսպիսի վերապատրաստումների դերը, նշեց, որ դրանք լավ հնարավորություն են ընձեռում մի նոր աստիճանի հասցնելու կրթության որակը, այն համապատասխանեցնելու ժամանակի պահանջներին: Օտար լեզուների ամբիոնի վարիչը շնորհակալություն հայտնեց ռեկտոր Կորյուն Աթոյանին` համակողմանի աջակցության համար:
ՀՊՏՀ Լրատվության և հասարակայնության հետ կապերի բաժին