ՀՊՏՀ մարզադահլիճում այսօր կմեկնարկի վոլեյբոլի աղջիկների առաջնությունը

Ինչպես արդեն տեղեկացրել ենք, Երևանի պետական համալսարանի մարզադահլիճում ապրիլի 15-ին մեկնարկել էր ՀՀ բուհերի ուսանողների 14-րդ հանրապետական մարզական խաղերի շրջանակում անցկացվող վոլեյբոլի տղաների առաջնությունը:  Եզրափակիչ խաղերը տեղի են ունեցել  ապրիլի 20-ին:  Ցավոք, ՀՊՏՀ վոլեյբոլի տղաների հավաքականին բախտը չի ժպտացել, և մեր տղաները դուրս են մնացել մրցանակային տեղերի համար պայքարից: Մրցաշարի հաղթող է դարձել Հայաստանի պետական ճարտարագիտական համալսարանի հավաքականը, 2-րդ հորիզոնականը զբաղեցրել է Հայ-ռուսական (սլավոնական), 3-րդը`  Երևանի պետական համալսարանների հավաքականները:
Այսօր,  ժամը 14.30-ին մեր համալսարանի մարզադահլիճում Հյուսիսային և Խ. Աբովյանի անվան հայկական պետական մանկավարժական համալսարանի հավաքականների խաղով կմեկնարկի ՀՀ բուհերի ուսանողների 14-րդ մարզական խաղերի շրջանակում անցկացվող վոլեյբոլի աղջիկների առաջնությունը: Ժամը 15. 15-ին մրցասպարեզ դուրս կգան Հայաստանի պետական տնտեսագիտական  և Երևանի պետական բժշկական համալսարանների թիմերը:  Այնուհետև կհաջորդեն   Հայաստանի պետական ճարտարագիտական և Վ. Բրյուսովի անվան պետական լեզվաբանական համալսարանների (ժամը 16.00) և Երևանի պետական և Հայաստանում ֆրանսական համալսարանների հավաքականների խաղերը (ժամը 16.45):
Վոլեյբոլի աղջիկների մրցաշարին մասնակցող  9 թիմերը հանդես կգան երկու ենթախմբով:  ՀՊՏՀ հավաքականը ընդգրկվել է 2-րդ ենթախմբում և կմրցի Հյուսիսային, Խ. Աբովյանի անվան հայկական պետական մանկավարժական և Երևանի պետական համալսարանների թիմերի հետ: Հաղթողի կոչման համար կպայքարեն իրենց ենթախմբերում առաջին տեղը զբաղեցրած հավաքականները:
Հաջողություն և հաղթանակ ենք մաղթում մեր մարզուհիներին:
 
ՀՊՏՀ Լրատվության և հասարակայնության  հետ կապերի բաժին