Հայաստանի ուսանողությունը՝ Եվրոպայի ամենամեծ ուսանողական ընտանիքի անդամ

Երեկ, դեկտեմբերի 2-ին, Մալթայում տեղի ունեցած Եվրոպայի ուսանողական  միության համաժողովի քվեարկության արդյունքում ձայների ճնշող մեծամասնությամբ (ընդամենը 2 դեմ) Հայաստանի ուսանողական ազգային ասոցիացիան (ՀՈՒԱԱ) ընդգրկվել է Եվրոպայի ուսանողական միության կազմում`ստանալով լիիրավ անդամի կարգավիճակ: Այս մասին ՀՊՏՀ լրատվության և  հասարականության հետ կապերի բաժնին հայտնեց ՀՈՒԱԱ փոխնախագահ, ՀՊՏՀ ուսանողական խորհրդի նախագահ Սևակ Խաչատրյանը: Վերջինիս տեղեկացմամբ` համաժողովի աշխատանքներին մասնակցող հայաստանյան պատվիրակությունը ղեկավարել է ՀՈՒԱԱ միջազգային հարաբերությունների գծով նախագահ, ՀՊՏՀ կառավարման ամբիոնի ասիստենտ Սարգիս Ասատրյանցը: Եվրոպական ուսանողական միության աշխատանքներին ՀՊՏՀ-ից մասնացել են նաև կառավարման ֆակուլտետի ուսանող Արուս Հարությունյանը և  տնտեսագիտության տեսության ամբիոնի ասիստենտ Աղավնի Օհանյանը:

Սևակ Խաչատրյանի դիտարկմամբ` Եվրոպայի ամենամեծ ուսանողական ընտանիքում Հայաստանի ուսանողության ներկայությունը  շատ կարևոր ու մեծ ձեռքբերում  է, որը լայն հնարավորություններ կընձեռի ուսանող երիտասարդությանը:

«Սա մի  բացված դուռ է, որ ուսանողներին թույլ կտա մասնակցելու տարբեր կրթական, երկարաժամկետ և կարճաժամկետ  ուսանողների փոխանակման ծրագրերի»,-մեզ հետ զրույցում նշեց Սևակ Խաչատրյանը` հատուկ շնորհակալություն  հայտնելով ՀՀ ԿԳ նախարար Արմեն Աշոտյանին և ՀՊՏՀ ռեկտոր Կորյուն Աթոյանին` Եվրոպական  ուսանողական միությանն անդամագրվելու          2 տարի տևած գործընթացում անգնահատելի օգնության ու աջակցության համար:

ՀՊՏՀ Լրատվության  և հասարակայնության հետ կապերի բաժին