«Ուսանողական աշուն 2012» մարզամշակութային փառատոնի հաղթող ճանաչվեց կառավարման ֆակուլտետը

Մեր բուհում այսօր տեղի ունեցավ «Ուսանողական աշուն 2012» մարզամշակութային փառատոնի եզրափակումը՝ երգի, պարի, «Ժողն իմ աչքերով» խորագրով տեսաֆիլմերի միջֆակուլտետային մրցույթի ամփոփմամբ: Այսօր ևս ՀՊՏՀ մեծ դահլիճում հավաքված հանդիսատեսը ջերմ ծափերով  աջակցեց ու ոգևորեց մասնակիցներին: Բեմահարթակը տրամադրվեց ֆակուլտետների շնորհալի ուսանողներին, ովքեր փորձեցին իրենց կատարումներով  շահել հանդիսատեսի համակրանքը: Բուռն ոգևորությամբ ընդունվեցին ֆակուլտետների` սիրելի համալսարանին ձոնված տեսաֆիլմերը: Մասնակիցների ելույթները գնահատեց ՀՊՏՀ  ուսանողական խորհրդի նախագահությունը: Հայտարարվեցին վերոնշյալ մրցույթներում  առաջին երեք հորիզոնականները զբաղեցրած ֆակուլտետների անունները: Այսպիով` երգի մրցույթում 1-ին տեղը զբաղեցրեց կառավարման  ֆակուլտետը, 2-րդը` ինֆորմատիկայի և վիճակագրության, 3-րդը` ֆինանսական ֆակուլտետները:

Պարի մրցույթում հաղթեց  տնտեսության կարգավորման և միջազգային տնտեսական հարաբերությունների ֆակուլտետը, 2-րդ հորիզոնականում էր կառավարման, 3-րդում` հաշվապահական հաշվառման և աուդիտի ֆակուլտետները: Համալսարանին ձոնված լավագույն տեսաֆիլմ ճանաչվեց կառավարման ֆակուլտետի ներկայացրած ֆիլմը, 2-րդ տեղում էր տնտեսության կարգավորման և միջազգային տնտեսական հարաբերությունների, 3-րդում`հաշվապահական հաշվառման և աուդիտի ֆակուլտետները:  

Ֆակուլտետների մրցելույթներից հետո բեմահարթակը տրամադրեց ՀՊՏՀ  ուսանողական խորհրդի փոխնախագահ Սերգեյ Խառատյանին: Վերջինս հայտարարեց «Ուսանողական աշուն 2012» մարզամշակութային փառատոնի շրջանակներում անցկացվող միջոցառումների ընթացքում բոլոր մրցելույթների հանրագումարում առավելագույն միավորներ վաստակած ֆակուլտետի անունը և նրանց հանձնեց հաղթողի գավաթը և պատվոգրեր:  Այսպիսով` 17 միավորով հաղթող ճանաչվեց կառավարման ֆակուլտետը, 2-րդ հորիզոնականը զբաղեցրեց տնտեսության կարգավորման և միջազգային տնտեսական հարաբերությունների (15 միավոր), 3-րդը` ֆինանսական ֆակուլտետները (15 միավոր):  

ՀՊՏՀ Լրատվության և հասարակայնության հետ կապերի բաժին