Ստուգվում է «Էրազմուս+»-ի դիմորդների լեզվիմացությունը. անգլերենի հերթական քննությունն այսօր էր

Դիտումների քանակ՝ 2092

Հայաստանի պետական տնտեսագիտական համալսարանում «Էրազմուս+» միջազգային կրթական ծրագրի պատասխանատու արտաքին կապերի բաժինը ծրագրի դիմորդներին անգլերենի քննություն հանձնելու հնարավորություն է ընձեռում. անգլերենի իմացությունը հավաստող փաստաթուղթ (օրինակ՝ TOEFL, IELTS) չունեցող ուսանողները կարող են դիմել պատասխանատու բաժնին և քննությունը  հանձնել հենց համալսարանում: Ուշադրություն. այս քննության արդյունքն անցողիկ է միայն  «Էրազմուս+»-ի համար:

Լեզվիմացության հերթական ստուգատեսն այսօր էր, գրանցվել էր 65 դիմորդ: Քննությանը մասնակցելու իրավունք  ստացան  միայն նախապես գրանցվածները:

Արտաքին կապերի բաժնի պետ Վարդ Ղուկասյանը նշեց, որ ի տարբերություն նախորդների, այս քննության մասնակիցների թիվն աննախադեպ է, ծրագրի նկատմամբ հետաքրքրությունն աճում է:

Դիմորդները քննություն են հանձնում այս ուստարվա 2-րդ կիսամյակում արտերկրի բուհերում ուսումնառելու համար:

Տեղեկացնենք, որ վաղը արտաքին կապերի բաժնի աշխատակիցները քննություն կանցկացնեն Եղեգնաձորում՝ մասնաճյուղի դիմորդների համար:

Մրցույթի մասնակիցներին մաղթում ենք հաջողություն:

«Էրազմուս+»-ին վերաբերող հայտարարություններին կարող եք հետևել ՀՊՏՀ պաշտոնական կայքի «Միջազգային ծրագրեր» խորագրի ներքո:

ՀՊՏՀ Լրատվության և հասարակայնության հետ կապերի բաժին