ՀՊՏՀ-ում այսօր իր աշխատանքները սկսեց ՀՈՒԱԱ 6-րդ ընդհանուր ժողովը

Դիտումների քանակ՝ 956

ՀՊՏՀ մեծ դահլիճում այսօր իր աշխատանքներն սկսեց Հայաստանի ուսանողական ազգային ասոցիացիայի (ՀՈՒԱԱ) 6-րդ ընդհանուր ժողովը, որին մասնակցեցին  Երևանի 12 բուհերի ուսանողական  ինքնակառավարման մարմինների և «Հայաստանի ոչ պետական բուհերի ուսանողական կենտրոն» հասարակական կազմակերպության պատվիրակները:

ՀՈՒԱԱ  միջազգային հարաբերությունների հարցերով հանձնաժողովի նախագահ, 6-րդ ընդհանուր ժողովի նախագահող Սարգիս Ասատրյանցը, շնորհակալություն հայտնելով ՀՊՏՀ ռեկտոր Կորյուն Աթոյանին հյուրընկալության և ուսանողական նախաձեռնություններին ցուցաբերած օգնության և աջակցութան համար, ողջույնի համար ձայնը տրամադրեց հյուընկալող բուհի ռեկտորին:

Ողջունելով  6-դ ընդհանուր ժողովի պատվիրակներին`ՀՊՏՀ ռեկտոր Կորյուն Աթոյանը նշեց, որ ՀՊՏՀ  ուսանողական ինքնակառավարման մարմնի աշխատանքները հիմնված են ժողովրդավարական բարձր արժեքների վրա.  

բուհի ուսանողական խորհուրդը անկախ ներկայացուցչական մարմին է, որը բաց է բոլոր ուսանողների առաջ: Ռեկտորը վստահեցրեց, որ շարունակելու են խրախուսել ակտիվ, գիտակից և հասուն ուսանողներին, ապա հավելեց, որ ինքն էլ միշտ հանդես է գալիս ուսանողի շահերը պաշտպանողի դիրքերից։ «Մենք այն բուհերից ենք, որն ուշի ուշով հետևում  և աջակցում է այս  կառույցի աշխատանքներին, որի լիիրավ անդամ է ձեզանից յուրաքանչյուրի ուսանողական խորհուրդը: Մենք ուզում ենք տեսնել այնպիսի ուսանողների, որոնք չեն լինի զուտ դիտորդ կրթական գործընթացներում, այլ կլինեն դրանց կրողը և կարևորագույն շահառուն»,-բարի երթ մաղթելով ՀՈՒԱԱ 6-րդ ընդհանուր ժողովի աշխատանքներին` ասաց Կորյուն Աթոյանը (ռեկտոր  Կորյուն Աթոյանի ամբողջական ելույթին կարող եք  ծանոթանալ  ՀՊՏՀ  պաշտոնական կայքի  «Ռեկտորի  ելույթները»  խորագրի  ներքո):

Ուսանողության պատվիրականերին իր խոսքն ասաց Երևանի պետական համալսարանի ռեկտոր Արամ Սիմոնյանը: Նա հույս հայտնեց, որ ժողովում կքննարկվեն և վեր կհանվեն ուսանողության լուրջ ու  կենսական շահերին առնչվող խնդիրներ և կառաջարկվեն լուծումներ: ԵՊՀ ռեկտորի դիտարկմամբ` խնդիրներից առաջինը հանրապետության ուսանողության համախմբումն է, իսկ երկրորդը`  Եվրոպական ուսանողական ասոցիացիային անդամակցությունը, որն այս պահին, Արամ Սիմոնյանի խոսքով, ցավոք իրականություն չէ:  Արամ Սիմոնյանը ուսանողներին մաղթեց ՀՈՒԱԱ-ի շուրջ համախմբում` բառի իսկական իմաստով:

Հայաստանի պետական ճարտարագիտական համալսարանի ռեկտոր Արա Ավետիսյանը, ողջույնի իր խոսքում կարևորելով ուսանողների դերն ապագայի կառուցման գործում, ցանկացավ, որ ուսանողները սիրով վերաբերվեն իրենց ընտրած մասնագիտության, լինեն ակտիվ, գործունյա և  կառուցեն բոլորիս երազած քաղաքացիական հասարակությունը:

Ուսանողների պատվիրակներին ողջունեց և բեղմնավոր աշխատանք մաղթեց Որակի ապահովման  ազգային կենտրոնի տնօրեն Ռուբեն Թոփչյանը: Վերջինս նշեց, որ այսօր բարձրագույն ուսումնական հաստատություններում կարևորվող որակի ապահովման գործընթացներում մեծ է ուսանողների դերը և լավ արդյունքի կարելի է հասնել միայն համախմբված աշխատանքի շնորհիվ:

ՀՈՒԱԱ նախագահ Արմեն Ալեքսանյանը, ողջունելով 6-րդ ընդհանուր ժողովի մասնակիցներին, տեղեկացրեց, որ  վերջին տարիների ընթացքում իրենց կազմակերպությունը միջազգային ծրագրեր է իրականացնում` պատրաստվելով անդամագրվել  ուսանողների եվրոպական միությանը:

ՀՊՏՀ ուսանողական խորհրդի նախագահ, ՀՈՒԱԱ փոխնախագահ Սևակ Խաչատրյանը հատուկ շնորհակալություն հայտնեց ՀՊՏՀ ռեկտոր Կորյուն Աթոյանին՝ ուսանողության նախաձեռնություններին, ՀՈՒԱԱ–ին աջակցելու համա։ Բարի երթ մաղթելով ժողովի աշխատանքներին` նա հույս հայտնեց, որ Հայաստանի ուսանողական ազգային ասոցիացիային կհաջողվի արտահայտել Հայաստանի բոլոր ուսանողների և ոչ թե առանձին խմբերի ձայնը։

Այնուհետև ՀՈՒԱԱ 6-րդ ընդհանուր ժողովը անցավ օրակարգային հարցերի քննարկմանը:

ժողովն իր աշխատանքները կշարունակի նաև վաղը` նոյեմբերի 21-ին:

 ՀՊՏՀ Լրատվության և հասարակայնության հետ կապերի բաժին