«Կոլեկտիվ ներդրումային համակարգերի կառավարում» կրթական ծրագրի շնորհանդես և բաց դաս ՀՊՏՀ-ում

Դիտումների քանակ՝ 808

Այսօր՝ հոկտեմբերի 12–ին, Հայաստանի պետական տնտեսագիտական համալսարանում (ՀՊՏՀ) տեղի ունեցավ «Կոլեկտիվ ներդրումային համակարգերի կառավարում» մագիստրոսական կրթական ծրագրի շնորհանդես՝ ՀՀ Աշխատանքի և սոցիալական հարցերի նախարար Արտեմ Ասատրյանի, «Կենսաթոշակային համակարգի իրազեկման կենտրոն» հիմնադրամի տնօրեն Արտակ Ղազարյանի, ՄԱԿ-ի բնակչության հիմնադրամի ներկայացուցիչ Գարիկ Հայրապետյանի, ՀՀ Աշխատանքի և սոցիալական հարցերի նախարարության Աշխատանքի և զբաղվածության վարչության պետ Թադևոս Ավետիսյանի մասնակցությամբ։  
Միջոցառումը յուրատեսակ շնորհանդես էր մագիստրոսական նոր կրթական ծրագրով առաջին համալրումը կատարած «Կոլեկտիվ ներդրումային համակարգերի կառավարում» մասնագիտացման, որը ՀՊՏՀ  ֆինանսական ֆակուլտետի «Ֆինանսական շուկաներ և ինստիտուտներ» ամբիոնում ներդրվել է ՀՀ Աշխատանքի և սոցիալական հարցերի նախարարության և Հայաստանի պետական տնտեսագիտական համալսարանի միջև անցած տարի ստորագրված հուշագրի արդյունքում:
Ողջունելով հյուրերին և սկիզբ առած համատեղ գործունեությունը` ՀՊՏՀ ռեկտոր Կորյուն Աթոյանն ասաց. «Այսօր կրթության շուկայում մրցակցությունը հասել է ահռելի չափերի: Մենք վաղվա ապագա չենք ունենա, եթե այսօր մեր հանրապետությունում հիմք չդրվի նոր որակական կրթության: Մեր կրթության որակի գնահատականը կարող է տալ  միայն գործատուն: Այդ իսկ պատճառով առանց գործատուների հետ խորը համագործակցության մենք որևէ որակական արդյունք չենք տա»: Ռեկտորը նշեց նաև,  որ այս համագործակցությամբ բուհը սոսկ գործատուի պատվերը չի կատարում, այլ իրականացվում է համատեղ կրթական պլանների, ծրագրերի մշակում, համատեղ ուսումնական գործընթացների և արտադրական պրակտիկաների, քննությունների կազմակերպում, ընդհուպ մինչև ավարտական թեզերի համատեղ պաշտպանություն, «ինչից շահում է և բուհը, և գործատուն»։
ՀՀ Աշխատանքի և սոցիալական հարցերի նախարար Արտեմ Ասատրյանը շնորհակալություն հայտնեց  համագործակցության նախաձեռնողներին այն հիմքի համար, որը գերատեսչությունն իր ղեկավարությամբ շարունակում է։


«Մենք ունենք առարկայական խնդիր, որ մեր բուհերը, ուսումնական հաստատությունները իրոք պատրաստեն մասնագետներ, որոնք մրցունակ են աշխատանքի շուկայում և բավարարում են այսօրվա պահանջները» ,-ասաց Արտեմ Ասատրյանը՝ նշելով, որ նոր սերնդի երիտասարդ մասնագետների մասնագիտական հմտություններից է կախված հանրապետությունում ներդրվող կենսաթոշակային բարդ համակարգի հաջողությունը: Այնուհետև բաց դասի ձևաչափում նախարարը ներկայացրեց նոր կենսաթոշակային համակարգի արդյունավետ ներդրման ճանապարհները, բարեփոխումների կայացման ու զարգացման մեխանիզմները:
«Կենսաթոշակային համակարգի իրազեկման կենտրոն» հիմնադրամի տնօրեն Արտակ Ղազարյանն իր ելույթում նշեց, որ ներդրված կրթական ծրագրի շնորհիվ  համակարգն ապահովված կլինի կենսաթոշակային ոլորտի որակավորված մասնագետներով, որոնք մեծ պահանջարկ կվայելեն աշխատաշուկայում և բարեփոխումների ոգուն համապատասխան կունենան նոր մտածելակերպ, նոր հոգեբանություն, նոր գիտելիքներ:
Աշխատանքի և զբաղվածության վարչության պետ Թադևոս Ավետիսյանը մասնավորեցրեց այն նպատակային ուղղությունները,  որոնք կօժանդակեն «Կոլեկտիվ ներդրումային համակարգերի կառավարում» մասնագիտացման կայացմանը: Թադևոս Ավետիսյանի ներկայացմամբ՝ կլինեն դասախոսների և բարձր առաջադիմությամբ ուսանողների վերապատրաստումներ արտերկրում, յուրաքանչյուր կիսամյակ կանցկացվեն սեմինար մրցույթներ, կբարելավվեն ուսումնական պայմանները, կստեղծվի էլեկտրոնային գրադարան, կանցկացվեն քաղծառայության հատուկ կուրսեր` համապատասխան հավաստագրով:

Նշենք, որ «Կոլեկտիվ ներդրումային համակարգերի կառավարում» մասնագիտացմամբ այս տարի Տնտեսագիտական համալսարան է ընդունվել 33 դիմորդ և ստանում է  մագիստրոսական կրթություն։ Ընդհանուր առմամբ, ՀՊՏՀ-ն 6 կառույցի հետ 8 մասնագիտացմամբ մագիստրոսական կրթական ծրագիր է իրականացնում`նպատակ հետապնդելով նորացված ծրագրերով, նոր մոտեցումներով կադրեր պատրաստել գերատեսչությունների համար և միաժամանակ լուծել շրջանավարտների աշխատանքի տեղավորման խնդիրը։


ՀՊՏՀ Լրատվության և հասարակայնության հետ կապերի բաժին