ՀՊՏՀ աշխատակիցները Արցախում մասնակցել են երիտասարդական միջազգային գիտաժողովի

Արցախում  սեպտեմբերի 14-17-ը տեղի է ունեցել «Արցախի Հանրապետության միջազգային ճանաչման հիմնախնդիրներն ու հեռանկարները» խորագրով երկրորդ միջազգային երիտասարդական գիտաժողովը, որին մեր բուհից մասնակցել են «Ամբերդ» հետազոտական կենտրոնի «Տնտեսագիտական հետազոտություններ» ծրագրի հետազոտող, տ.գ.թ. Գայանե Թովմասյանը և որակի ապահովման բաժնի գլխավոր մասնագետ, միջազգային տնտեսական հարաբերությունների ամբիոնի ասիստենտ, տ.գ.թ. Աննա Փախլյանը:

«Արցախը՝ հանուն խաղաղության, ճանաչում՝ հանուն խաղաղության» կար­գա­խոսով գիտաժողովին մասնակցել են շուրջ 60 գիտնականներ, մասնագետներ ու վերլուծաբաններ ԱՄՆ-ից, Գերմանիայից, Լեհաստանից, Ռուսաստանից, Ուկրաինայից, Հայաստանից և Արցախից։  Գիտաժողովի աշխատանքներն ընթացել են իրավագիտության, քաղաքագիտության, տնտեսագիտության, պատմության, հոգեբանության և լրագրության բաժանմունքներում, ԱՀ Ազգային ժողովի նիստերի դահլիճում: Այս մասին մեզ տեղեկացնում են ՀՊՏՀ մասնակիցները:

Գայանե Թովմասյանը հանդես է եկել «Զբոսաշրջության զարգացումը որպես Արցախի Հանրապետության տնտեսության զարգացման և միջազգային ճանաչման գրավական» թեմայով զեկուցմամբ:

«Զեկույցում քննարկ­վել է զբոսաշրջության ոլորտի առկա վի­ճա­կը Արցախում, ոլորտի պետական քաղաքականության նպատակ­նե­րը և մար­քեթինգային քաղաքականությունը, դիտարկ­վել է վճարային հաշ­­վեկշռի ճանապարհորդություն ենթահաշիվը, որի հիման վրա հաշ­­վարկ­վել է մեկ զբոսաշրջիկի ծախսած միջին գումարը: Վերլուծ­վել են զբո­­սաշրջության հիմնական տեսակների՝ պատմամշակու­թա­յին, կրո­­նա­կան, առողջարանային, ագրո- և էկո-, քաղա­քա­յին, սպոր­տա­յին և արկածային, զարգացման նա­խադրյալները, ռե­սուր­սային հնա­րա­վո­րութ­յունները, հիմնական զբոսաշրջային վայրերը Արցախում՝ մատ­նա­նշելով հիմ­նական քայլերը՝ զբոսաշրջության զարգացման ուղղութ­յամբ»,- մասնավորեցնում է հեղինակը:

Աննա Փախլյանը ներկայացել է  «ԱրցախիՀանրապետության միջազգային համագործակցության ընդլայնման հնարավորությունները» զեկուցումը, որտեղ, նրա խոսքով, ցույց է տրվել Արցախի Հանրապետության՝ միջազգային իրավունքի սուբյեկտի դերում հանդես գալու իրավական հիմքերն ու դրանց համապատասխանության վերաբերյալ տնտեսական հիմնավորումները:

Անկախ դիվանագիտական հարաբերությունների առկայությունից՝ երկրի փաստացի առևտրային հարաբերությունները 22 գործընկեր երկրների հետ Աննա Փախլյանը դիտարկել է որպես այլ երկրների հետ հարաբերություններ հաստատելու կարողության հիմնավորում, ինչը պետականության հռչակման կարևոր գործոններից մեկն է: Հոդվածում երկրի միջազգային ճանաչումը խթանելու նպատակով կարևորվել է համագործակցությունը միջազգային կառույցների և հասարակական կազմակերպությունների հետ, որոնց միջոցով Արցախի խնդիրներն ու դիրքորոշումները հասանելի կլինեն միջազգային հանրությանը:

Երիտասարդական միջազգային գիտաժողովը կազմակերպել է Արցախի երիտասարդ գիտնականների և մասնագետների միավորումը` ՀՀ սպորտի և երիտասարդության հարցերի նախարարությանու«Զանգեզուրի պղնձամոլիբդենային կոմբինատ» ՓԲԸ-իֆինանսական աջակցությամբ։

Մասնակիցները նաև ներկա են գտնվել Տողի մելիքական ապարանքում կազմակերպված արցախյան գինու 4-րդ փառատոնին:

ՀՊՏՀ Լրատվության և հասարակայնության հետ կապերի բաժին