ՄՏՀ ամբիոնի ներկայացուցիչները բանախոսել են օտարերկրյա բուհերում և առաջարկում են ՀՊՏՀ-ում կրթական նոր փորձ ներդնել

Դիտումների քանակ՝ 2448

ՀՊՏՀ միջազգային տնտեսական հարաբերությունների ամբիոնի  ղեկավար, տ.գ.դ., դոցենտ Դիանա Գալոյանը և ասիստենտ, տ.գ.թ. Սուսաննա Աղաջանյանը «Էրազմուս+»  ծրագրով ապրիլ-մայիս ամիսներին բանախոսել են եվրոպական համալսարաններում:

Դիանա Գալոյանը մայիսի 8-12-ը Աթենքի (Հունաստան)  տնտեսագիտության և բիզնեսի համալսարանում դասախոսել է «ԵՄ շրջանակներում արժութային միության ձևավորման հեռանկարները», «ԵՄ-ԵԱՏՄ համեմատական վերլուծություն» թեմաներով:

Սուսաննա Աղաջանյանը ապրիլի 23-30-ը գտնվել է Պոզնանի տնտեսագիտության և բիզնեսի համալսարանում (Լեհաստան) և բակալավրական ու մագիստրոսական կուրսերում  հանդես եկել «ՀՀ տնտեսության մրցունակությունը»և  «ՀՀ արտաքին առևտուրը»  թեմաներով, ընդ որում՝ 2-րդ թեմայի շրջանակում առանձնահատուկ անդրադարձ է կատարել Հայաստան-Լեհաստան առևտրային գործակցությանը:

ՀՊՏՀ պատվիրակը լսարանի ուշադրությանն է ներկայացրել նաև մեր համալսարանի, ինչպես նաև Հայաստանի մասին պատմող  տեսանյութեր: «Հատկապես միջազգային խմբի ուսանողները հետաքրքրվում էին Հայաստանում տուրիզմի զարգացման հնարավորություններով, ոլորտում առկա խնդիրներով: Նրանք ցանկանում էին ծանոթանալ մեր երկրի տեսարժան այն վայրերին, որոնք զբոսաշրջիկների հետաքրքրության կենտրոնում են»,-ընդգծեց ասիստենտը:

Այսօր միջազգային տնտեսական հարաբերությունների ամբիոնի նիստում ծրագրի մասնակիցները ներկայացրել են  իրենց այցի հիմնական արդյունքները՝ ներկայացնելով արտասահմանյան բուհերի լավագույն փորձը և հանդես գալով  այն տեղայնացնելու առաջարկություններով: Օրինակ,  Դիանա Գալոյանն առաջարկում է փորձնական ուսումնական ծրագիր ներդնել՝ սեմինարների ձևաչափը դարձնելով ավելի գործնական: Իսկ  Սուսաննա Աղաջանյանը նշել է, որ լեհ դասախոսները մշակել են,  այսպես  կոչված, մտավոր սեփականության արդյունքների օգտագործման հայեցակարգ, որը կարգավորում է հեղինակի (աղբյուրի) և օգտագործողի հարաբերությունները և այսօր քննարկման է ներկայացրել  այս փորձը ՀՊՏՀ-ում ներդնելու նպատակահարմարությունը:

Սուսաննա Աղաջանյանը մեզ տեղեկացրեց նաև, որ հունիսի 5-9-ը մասնագիտական վերապատրաստում է անցել Ֆրանսիայում. մասնակցել է «Pebeo» ընկերության կազմակերպած «Product development and management» խորագրով վերապատրաստման դասընթացին, որի ավարտին ստացել է դիպլոմ:

Հիշեցնենք, որ ՀՊՏՀ-ում «Էրազմուս +»-ի ծրագիրը համակարգում է արտաքին կապերի բաժին:

ՀՊՏՀ Լրատվության և հասարակայնության հետ կապերի բաժին