Ասպարեզում երիտասարդ ճարտասաններն էին

Շուրջ երկու տասնամյակ է՝ «Պարույր Հայկազն» երիտասարդ ճարտասանի մրցույթի նախաձեռնող ու կազմակերպիչ, ՀՊՏՀ կառավարման ամբիոնի պրոֆեսոր, փիլիսոփայական գիտությունների դոկտոր, «Ճարտասանություն» բուհական դասագրքի հեղինակ Վալերի Միրզոյանը համախմբում է ճարտասանական ունակություններ ունեցող ուսանողներին, առիթ ստեղծում, որ նրանք անկաշկանդ ու վստահ խոսեն իրենց հուզող հարցերի մասին,  գեղեցիկ, անաղարտ հայերենով արտահայտվելու հմտություններ ձևավորեն:

Այսօր հերթական մրցույթն էր՝ կառավարման ֆակուլտետի 1-ին կուրսում: Անցկացվեց վիճակահանություն և հայտնի դարձավ ելույթների հաջորդականությունը: Այնուհետև Վալերի Միրզոյանը մասնակիցներին ներկայացրեց մրցատյանը, ինչպես նաև գնահատման չափանիշները` որքանով է խոսքը հասկանալի ու համոզիչ, լեզվական անաղարտություն, լսարանը կառավարելու ունակություն, ճարտասանի պահվածք:

Այսպիսով` խոսքի արվեստին տիրապետելու, իրենց ուժերը փորձելու ձգտումը լսարան էին բերել ասելիք ունեցող բազմաթիվ ուսանողների, որոնց համար մրցույթը դարձավ փորձառելու և ոգեշնչվելու հրաշալի առիթ:

11 ուսանող փորձեց հատկացված 9 րոպեում ի ցույց դնել հռետորական արվեստին տիրապետելու իր հմտությունները: Ուսանողներն ընտրել էին արդիական թեմաներ, որոնք առնչվում էին, օրինակ,  21-րդ դարի համամարդկային խնդիրներին (շրջակա միջավայրի պահպանություն, համացանցից կախվածություն և այլն), արտագաղթին, հավասարության սկզբունքներին, մահապատժին, առաջնորդությանը:

Մրցատյանում ընդգրկված էին ինչպես պրոֆեսորադասախոսական կազմի ներկայացուցիչներ, այնպես էլ ուսանողներ: Նրանց հիացմունքին արժանացավ և առավելագույն միավորով հաղթեց Մերի Ստեփանյանը: Նա իր ելույթով լսարանին ներկայացավ որպես հայրենասիրության ջատագով և արտագաղթը դիտարկեց որպես հայրենիքը վտանգող  բացասական երևույթ: Հաղթողը ստացավ խրախուսական գումար, պատվոգիր և Վալերի Միրզոյանի մակագրությամբ գիրք, իսկ մյուս  10 մասնակիցները՝ գումար և  մակագրված գրքեր:

ՀՊՏՀ լրատվության և հասարակայնության հետ կապերի բաժնի հետ զրույցում Մերի Ստեփանյանն ասաց, որ առանձնահատուկ հետաքրքրություն ունի հռետորական արվեստի նկատմամբ, իսկ պարոն Միրզոյանի դասաժամերին հետաքրքրությունն ավելի է մեծացել:

«Կարծում եմ, մեզնից յուրաքանչյուրը պետք է տիրապետի գեղեցիկ խոսելու արվեստին, իսկ կառավարչի համար դա առանձնակի կարևորություն ունի: Ինձ համարում եմ հայրենասեր մարդ և կարծում եմ՝ բոլորիս պետք է մտահոգի արտագաղթի թեման: Ահա թե ինչու այսօր այդ թեմայով ամբիոնից հնչեցրի իմ ելույթը»,-ասաց հաղթողը:

Միջոցառման ավարտին մասնակիցներին շնորհավորեց կառավարման ֆակուլտետի դեկանի տեղակալ Մերի Բադալյանը, ով ընդգրկված էր մրցատյանում: Նա ողջունեց նմանատիպ  նախաձեռնությունները և երախտագիտական խոսք հղեց Վալերի Միրզոյանին:

«Պարույր Հայկազն» երիտասարդ ճարտասանի մրցույթը հովանավորել էր (տրամադրել էր գրքերն ու դրամական պարգևները) ՀՊՏՀ շրջանավարտ, տնտեսագիտության դոկտոր Դավիթ Հարությունյանը, ով տարիներ առաջ եղել է նույն մրցույթի հաղթողը:

ՀՊՏՀ Լրատվության և հասարակայնության հետ կապերի բաժին