ՀՊՏՀ աշխատակիցները «Էրասմուս+» ծրագրով այցելել են Հունգարիայի Միսկոլիչի համալսարան
ՀՊՏՀ տնտեսագիտության տեսության ամբիոնի ասիստենտ, տ.գ.թ. Տաթևիկ Մկրտչյանը և մարքեթինգի ամբիոնի ավագ լաբորանտ, ասպիրանտ Մանուշ Քալանթարյանը «Էրասմուս+» ծրագրի շրջանակներում հոկտեմբերի 23-29-ը այցելել են Հունգարիայի Միսկոլիչի համալսարան: Առաջինը՝ դասախոսների, իսկ երկրորդը՝ վարչական անձնակազմի փոխանակման ծրագրերի շրջանակներում առիթ են ունեցել հանդիպումներ ունենալու և հանդես գալու մասնագիտական և աշխատանքային շնորհանդեսներով:
Տաթևիկ Մկրտչյանը լրատվության և հասարակայնության հետ կապերի բաժնին հայտնեց, որ այցի ընթացքում ինքը Միսկոլիչի համալսարանի բակալավրիատի ուսանողների և ասպիրանտների համար հանդես է եկել «Նեյրոտնտեսագիտություն» ու «Սպառողի հոգեբանություն և ընտրության պարադոքս» թեմաներով դասախոսություններով: Համալսարանից մեր դասախոսը վերադարձել է տպավորված:
«Հատկապես տպավորված եմ ասպիրանտներից: Իրենք էլ տպավորված էին դասախոսություններից, նշեցին, որ այն բավական տեղեկատվական էր, նորություններով հագեցած: Ինձնից անգամ դասախոսության տեքստն էին խնդրել, որը ես ուղարկեցի»,- նշեց Տաթևիկ Մկրտչյանը:
Վարչական աշխատակիցների փոխանակման ծրագրով նույն համալսարանում հյուրընկալված Մանուշ Քալանթարյանը հանդիպումներ է ունեցել վարչական ստորաբաժանումների, մասնավորապես միջազգային կապերի պատասխանատուների ու նաև՝ մարքեթինգի ֆակուլտետի ղեկավարների և ներկայացուցիչների հետ:
«Քննարկել ենք համատեղ ծրագրեր իրագործելու հնարավորությունը: Որպես մարքեթինգի ամբիոնի ներկայացուցիչ՝ ինձ հատկապես հետաքրքիր էր իրենց համանուն ֆակուլտետի հետ համատեղ գիտական հոդվածների պատրաստման հնարավորությունը, ինչի շուրջ արդեն իսկ ձեռք ենք բերել որոշակի պայմանավորվածություններ»,- նշեց Մանուշ Քալանթարյանը: Նա նաև հանդես է եկել Հայաստանի պետական տնտեսագիտական համալսարանը ներկայացնող շնորհանդեսով:
ՀՊՏՀ Լրատվության և հասարակայնության հետ կապերի բաժին