Սեպտեմբերի 1-ին ՀՊՏՀ-ն հանդիսավորությամբ կդիմավորի իր ուսանողներին. անհրաժեշտ տեղեկատվությունը և դասացուցակները՝ ՀՊՏՀ պաշտոնական կայքում (asue.am)

Հաշված ժամեր են մնացել 2016-2017 ուսումնական տարվա մեկնարկին: Հայաստանի պետական տնտեսագիտական համալսարանը բարենորոգ ու արդիականացված բուհական միջավայրում վաղը կհյուրընկալի իր ուսանողներին:

Ուսումնական տարվան ընդառաջ այժմ ընթանում են նախապատրաստական վերջին աշխատանքները: ՀՊՏՀ ռեկտոր, պրոֆեսոր Կորյուն Աթոյանն այսօր հանդիպման է հրավիրել համալսարանի պրոռեկտորներին և դեկաններին, քննարկել նոր ուսումնական տարին բնականոն կազմակերպելու ընթացքին վերաբերող հարցեր, տվել հանձնարարականներ: ՀՊՏՀ գեղատեսիլ բակում տեղադրվել է նոր պաստառ՝ «Դարձի'ր մրցունակ» կարգախոսով:

Ավանդաբար, սեպտեմբերի 1-ին առանձնակի ուշադրություն է հատկացվում 1-ին կուրսեցիներին. հանդիսավոր ու ջերմ մթնոլորտում տնտեսագիտական մայր բուհը բարի գալուստ է ասում իր նորեկներին: Այս տարի էլ, նոր ուսումնական տարվա մեկնարկն ու Գիտելիքի օրը մեր բուհում կազդարարվի սեպտեմբերի 1-ի առավոտյան ժամը 9.00-ից,  համալսարանի բակում կմեկնարկի ուսանողների հանդիսավոր ընդունելության արարողությունը, որի ժամանակ  ՀՊՏՀ ռեկտոր, պրոֆեսոր Կորյուն Աթոյանը  շնորհավորական ուղերձ կհղի ուսանողներին:

Սեպտեմբերի 1-ին մեկնարկում են  ՀՊՏՀ առկա բակալավրիատի բոլոր կուրսերի և  առկա մագիստրատուրայի 2-րդ  կուրսերի ուսումնական պարապմունքները: Առկա  մագիստրատուրայի 1-ին կուրսի դասերը կմեկնարկեն սեպտեմբերի 5-ին (մագիստրատուրայի 1-ին կուրս ընդունվածների ցուցակները կհրապարակվեն շուտով): 1-ին հերթում դասերի մեկնարկը առավոտյան ժամը 9.30-ին է (առկա բակալավրիատ): Առկա մագիստրատուրայում դասերը կկազմակերպվեն 2-րդ հերթում՝ ժամը 14.00-ից սկսած:

ՀՊՏՀ հեռակա բակալավրիատի և մագիստրատուրայի  2016-2017 ուստարվա 1-ին կիսամյակի ուսումնական պարապմունքների և քննաշրջանի ժամանակացույցին ծանոթացեք հետևյալ հղումով՝ media.asue.am/upload/rectorat/herakai_jamanakacuyc_2016-2017.pdf :

Դասացուցակներին կարող եք ծանոթանալ հետևյալ հղումով՝ www.asue.am/am/էջեր-220//դասացուցակ-50:

Նշենք, որ ներկայացված  դասացուցակներում հնարավոր են որոշ փոփոխություններ:

1-ին կուրսեցիների ուսման վարձը թույլատրվել է վճարել մինչև սույն թվականի սեպտեմբերի 10-ը՝ համաձայն 2016-2017 ուստարում բակալավրիատի առկա վճարովի առանց տարկետման իրավունքով ուսուցման համակարգի 1-ին կուրս ընդունելու համար ուսման վարձը վճարելու թույլտվության մասին ՀՊՏՀ ռեկտորի  հրամանի: Հիշեցնենք, որ առաջին կուրսեցիները հրամանագրվում են  վարձը վճարելուց հետո:

Ուսման վարձերի գանձման համար Հայաստանի պետական տնտեսագիտական համալսարանում գործում են հետևյալ  դրամային հաշվեհամարները՝

«ԱրարատԲանկ» ԲԲԸ՝     h/h 1510002779480100

«Հայբիզնեսբանկ» ՓԲԸ    h/h 11500788434500

Ի գիտություն ուսանողների՝ անհրաժեշտ է վճարման հանձնարարականի նպատակդաշտում  մանրամասն լրացնել՝

1.ուսանողի անուն, ազգանուն, հայրանունը

2.ֆակուլտետը, մասնագիտությունը, կուրսը :

Բարի գալու'ստ, սիրելի ՀՊՏՀ-ականներ:

ՀՊՏՀ Լրատվության և հասարակայնության հետ կապերի բաժին