Դեկան Ատոմ Մարգարյանի ծրագիրը արժանացել է DAAD հետազոտական դրամաշնորհին
![](https://asue.am/images/1521886836/4b6062e0a34053f78a1abc6f.jpg)
ՀՊՏՀ տնտեսության կարգավորման և միջազգային տնտեսական հարաբերությունների ֆակուլտետի դեկան, տ.գ.թ., դոցենտ Ատոմ Մարգարյանի ծրագիրը հաղթել է Գերմանիայի արտաքին ակադեմիական փոխանակության կազմակերպության (DAAD) հետազոտական դրամաշնորհային ծրագրերի մրցույթում: Օրերս ՀՀ-ում Գերմանիայի Դաշնային Հանրապետության դեսպանի նստավայրում կազմակերպված ընդունելության ժամանակ դեսպան Մաթիաս Քիսլերը մեր համալսարանի ներկայացուցչին է հանձնել DAAD նախագահ Մարգրեթ Վինթերմանթելի հրավերը և դրամաշնորհային ծրագրի փաստաթղթերի փաթեթը։ Ընդունելությանը մասնակցել են ՀՀ-ում DAAD գրասենյակի ղեկավարը և շահառու գիտնական-հետազոտողներ, ասպիրանտներ և մագիստրանտներ տարբեր բուհերից։
Մեզ հետ ունեցած զրույցում Ատոմ Մարգարյանը տեղեկացրեց, որ DAAD այս տարվա հետազոտական ծրագրերի մրցույթին մասնակցել են ՀՀ բարձրագույն կրթության ոլորտի 27 ներկայացուցիչների ծրագրեր, որոնցից 9-ը արժանացել են դրամաշնորհի։ DAAD դրամաշնորհը մեր համալսարանի ներկայացուցչին հնարավորություն կտա հուլիս-օգոստոս ամիսներին հետազոտական ծրագիր իրականացնել Շտուտգարտի Հոհենհայմ համալսարանում։ Ծրագրի գործընկերը և հյուրընկալող կողմը Հոհենհայմ համալսարանի Գիտության և միջազգայնացման հարցերի գծով պրոռեկտոր, պրոֆեսոր Անդրեաս Պիկան է, որը միաժամանակ այդ համալսարանի Ինովացիոն տնտեսագիտության ամբիոնի վարիչն է։
![](https://asue.am/images/1521886836/e46b5fbf706a05e9b63fde7e.jpg)
Ներկայացնելով ծրագիրը՝ Ատոմ Մարգարյանն ընդգծեց, որ DAAD ծրագրերի շրջանակներում գերմանացի գործընկերների հետ նա աշխատում է 1991 թվականից։ Այդ ժամանակահատվածում նա նմանօրինակ ծրագրեր է իրականացել Կոնստանցի, Աուգզբուրգի և Յենայի համալսարաններում։ Ներկայիս դրամաշնորհային ծրագրի թեման առնչվում է զարգացած և անցումային երկրների միջև տեխնոլոգիական խզվածքի հաղթահարման հիմնախնդիրներին։
Դեկան Մարգարյանը նշեց, որ այսօրինակ ծրագրերը թույլ են տալիս ոչ միայն համատեղ հետազոտություններ անցկացնել, այլև ձևավորել ուսանողների, ասպիրանտների և դասախոսների փոխանակության համար նոր հիմքեր և հնարավորություններ։ «Գերմանական այն համալսարաններում, որոնցում ես նախկինում նմանօրինակ ծրագրեր եմ իրականացրել, իմ խորհրդով և աջակցությամբ արդեն ուսանում կամ ասպիրանտական ծրագրեր են իրականացնում մեր համալսարանի բակալավրիատի և մագիստրատուրայի մի շարք շրջանավարտներ»,-հավելեց Ատոմ Մարգարյանը։
ՀՊՏՀ Լրատվության և հասարակայնության հետ կապերի բաժին