Երկրատեղեկատվական համակարգերի կարևորությունը. վերլուծում են ՀՊՏՀ գիտնականները
Համալսարանի նիստերի սրահում այսօր նաև «Երկրատեղեկատվական համակարգեր» գիտաուսումնական խմբի շնորհանդեսն էր, որին մասնակցում էին ռեկտոր, պրոֆեսոր Կորյուն Աթոյանը, գիտության և արտաքին կապերի գծով պրոռեկտոր, պրոֆեսոր Գագիկ Վարդանյանը, գիտության բաժնի պետ, դոցենտ Խորեն Մխիթարյանը, պրոֆեսորադասախոսական կազմի ներկայացուցիչներ, ուսանողներ:
«Հայաստանի Հանրապետությունում երկրատեղեկատվական համակարգերի կիրառումը անշարժ գույքի կառավարման բնագավառում» հետազոտական թեմայի ղեկավար, բնօգտագործման տնտեսագիտության ամբիոնի վարիչ, պրոֆեսոր Սուրեն Գևորգյանը շեշտադրեց, որ երկրատեղեկատվական համակարգի ստեղծումն ուղղված է պետական և տեղական ինքնակառավարման մարմինների, տնտեսության տարբեր ոլորտների խնդիրների արդյունավետ լուծմանը, բնական և տնտեսական ռեսուրսների վերաբերյալ տվյալների միասնական տեղեկատվական բազայի ստեղծմանը և ռեսուրսների կառավարման արդյունավետության բարձրացմանը:
Նա ներկայացրեց թեմայի կատարման ընթացքը և հավելեց, որ խմբի առաջարկությունները կներկայացվեն ՀՀ տարածքային կառավարման և արտակարգ իրավիճակների նախարարություն:
Թեմայի շուրջ բանախոսությամբ հանդես եկան հետազոտական խմբի անդամներ, բնօգտագործման տնտեսագիտության ամբիոնի ասիստենտներ Արմեն Ռուբենյանը և Գևորգ Ալոյանը (խմբի անդամներ են նաև մագիստրանտներ Քրիստինե Մքոյանը և Աբով Բաղդասարյանը): Ա. Ռուբենյանը ներկայացրեց երկրատեղեկատվական համակարգերի ծրագրագործիքային համալիրը, պատմական անդրադարձ կատարեց այլ երկրների փորձին, ներկաների ուշադրությունը հրավիրեց ԵՏՀ գործունեության սխեմային՝ կառավարման կանոնակարգման սկզբունքներին:
Գևորգ Ալոյանը խոսեց երկրատեղեկատվական համակարգերի ստեղծման ուղղությամբ մինչ օրս ՀՀ-ում կատարված աշխատանքների մասին՝ նշելով, որ համակարգի ձևավորումը թույլ կտա համալիր վերլուծությունների համար ստեղծել ամբողջական բազա, որը պարբերաբար կթարմացվի և արդյունավետ կառավարման համար կպարունակի հավաստի և ամբողջական տեղեկատվություն:
Հարցադրումներով հանդես եկան դոցենտներ Ատոմ Մարգարյանը և Վոլոդյա Մանասյանը:
Պրոռեկտոր Գագիկ Վարդանյանը շնորհակալություն հայտնեց թեման և կատարված աշխատանքը հանգամանալից ներկայացնելու համար, խորհուրդ տվեց հետագա աշխատանքներն առավելապես կառուցել տնտեսագիտական ուղղվածությամբ, ապա բոլոր խմբերի ղեկավարներին և մասնակիցներին կոչ արեց մասնակցել սեմինարներին, քանի որ բոլոր թեմաները փոխկապված են և փոխլրացնում են միմյանց:
ՀՊՏՀ Լրատվության և հասարակայնության հետ կապերի բաժին