Դիպլոմներ ստացան մարքեթինգի և բիզնեսի կազմակերպման ֆակուլտետի շրջանավարտները. DJ Վակցինան՝ ՀՊՏՀ գերազանցիկ մագիստրոս (լուսանկարներ)

Դիտումների քանակ՝ 1317

ՀՊՏՀ մարքեթինգի և բիզնեսի կազմակերպման ֆակուլտետի  մարքեթինգային հաղորդակցություններ և մարքեթինգային հետազոտություններ մասնագիտացումների  հեռակա ուսուցման 2015թ. շրջանավարտներն այսօր հանդիսավոր կերպով ստացան մագիստրոսական  դիպլոմները:

Ինչպես մեզ տեղեկացրեց մարքեթինգի ամբիոնի վարիչ, պրոֆեսոր Արարատ Զաքարյանը՝ մարքեթինգային հաղորդակցություններ մասնագիտացմամբ կա 26,  մարքեթինգային հետազոտություններ մասնագիտացմամբ՝ 13  շրջանավարտ: Ամբիոնի վարիչը մագիստրոսներին հանձնեց դիպլոմները և հաջողություն մաղթեց նրանց:

ՀՊՏՀ շրջանավարտների թվում է նաև հայտնի DJ Վակցինան, նույն ինքը՝ Արուսյակ Մկրտչյանը, ով ստացել է գերազանցության (կարմիր) դիպլոմ:

ՀՊՏՀ լրատվության և հասարակայնության հետ կապերի բաժնի հետ զրույցում  DJ Վակցինան նշեց, որ Տնտեսագիտական համալսարանում ստացել է իր 2-րդ մասնագիտությունը (առաջին մասնագիտությամբ կենսաբան է ):

«Միանշանակ, ՀՊՏՀ-ում ստացած գիտելիքներս կնպաստեն իմ կարիերային, ես ունեմ իմ բիզնեսը և  այնտեղ մարքեթինգային կրթությունը անհրաժեշտ է: Շատ գոհ եմ իմ ստացած կրթությունից, բուհի դասախոսներից: Ինձ շատ է աջակցել հատկապես դոցենտ Նարեկ Ղուկասյանը, ինչի համար հատուկ շնորհակալություն եմ հայտնում նրան»,-ասաց դիջեյը:

Մեզ հետ զրույցում շրջանավարտներ Լիլիթ Սիմոնյանն ու Քրիստինե Հովսեփյանը նշեցին,  որ մարքեթոլոգի մասնագիտությունն արդիական է, ուստի այսուհետ նրանց կարիերայում նոր հնարավորություններ են ստեղծվում: Քրիստինեն նշեց, որ արդեն աշխատում է որպես մենեջեր:

Մարքեթինգի ամբիոնի վարիչ Արարատ Զաքարյանի խոսքով՝ մարքեթինգի ֆակուլտետի շրջանավարտների մագիստրոսական թեզերի պաշտպանությունների (դեկտեմբեր, 2015 թ.) արդյունքները գոհացուցիչ էին:

«Շրջանավարտների հիմնական մասը բավականին խորությամբ տիրապետում է իր մասնագիտությանը, և վստահ եմ, որ նրանք իրենց տեղը կգտնեն աշխատաշուկայում և կկարողանան իրացնել մեր բուհում ստացած գիտելիքները»,-ասաց պրոֆեսորը:

Հիշեցնենք, որ այս օրերին ՀՊՏՀ ուսումնակազմակերպական բաժնից դիպլոմներն են ստանում ՀՊՏՀ հեռակա մագիստրատուրայի 2015թ. շրջանավարտները:

Շնորհավորում ենք ՀՊՏՀ մագիստրոսներին և մաղթում հաջողություններ:

ՀՊՏՀ Լրատվության և հասարակայնության  հետ կապերի բաժին