Միջազգայնագետները հմտանում են բանակցային արվեստում
Միջազգային տնտեսական հարաբերություններ մասնագիտության 4-րդ կուրսում «Միջազգային առևտուր» առարկայի դասախոս, տ.գ.դ., պրոֆեսոր Զոյա Թադևոսյանի նախաձեռնությամբ կազմակերպվել էր «Թիմային խաղ» բաց դասը, որի ընթացքում ուսանողներն ի ցույց դրեցին առևտրային բանակցային հմտությունները:
Խաղի ընթացքում 2 թիմերից մեկը ներկայացնում էր կահույքի միջազգային կազմակերպություն, մյուսը՝ փայտանյութ արտադրող ընկերություն: Գործընկերներ ձեռք բերելու նպատակով կողմերը բանակցում էին՝ միմյանց ծանոթացնելով իրենց գործունեությանը, առևտրաշրջանառության ծավալներին, ֆինանսական և տնտեսական ցուցանիշներին, սպառման շուկային և այլն: Հաջող բանակցությունների արդյունքում, թիմերը կնքեցին համագործակցության պայմանագիր:
Ուսանողները մեծ խանդավառությամբ էին պատրաստվել «բեմականացմանը», ներկայացել պատշաճ հագուկապով:
Ինչպես մեզ հետ զրույցում նշեց դասախոսը՝ պրոֆեսոր Զոյա Թադևոսյանը, դասընթացի շրջանակում գործնական գիտելիքներ են հաղորդվում՝ ինչպես գտնել գործընկերներ և իրականացնել արտաքին առևտրային գործարքներ, որում կարևոր են թե' ուղղակի, թե' միջնորդավորված կապերը, գործարքներ կնքելու և իրականացնելու տեխնիկան, պայմանագրերի կնքումն ու պայմանագրի կետերի իրականացումը, ներառյալ արբիտրաժը, վարկավորումը և այլն: Միաժամանակ, տնտեսագետ-միջազգայնագետները զարգացնում են բանակցային հմտությունները:
«Միջազգային առևտուր իրականացնողները բանակցային գործընթացում պետք է կարողանան ճիշտ ոճով հանդես գալ, գործընկերոջը հոգեբանորեն ճանաչեն, առավելագույնս ներկայացնեն իրենց մրցակցային առավելությունները: Գործնականում այս ամենը պատկերացնելու համար կազմակերպվում են նմանօրինակ թիմային խաղեր»,-նշեց Զոյա Թադևոսյանը հավելելով, որ այս գործնական պարապմունքները և' արդյունավետ են գիտելիքի ամրագրման տեսանկյունից, և' հետաքրքիր են ուսանողների համար:
ՀՊՏՀ Լրատվության և հասարակայնության հետ կապերի բաժին