Յուրատեսակ նախաձեռնություն ՀՊՏՀ բակում. առիթը գիրք նվիրելու օրն է (լուսանկարներ)

Դիտումների քանակ՝ 1189

Գիրք նվիրելու օրը մեր բուհի  ուսանողները նշեցին յուրատեսակ ֆլեշմոբով, որը նախաձեռնել էր մարքեթինգի և բիզնեսի կազմակերպման ֆակուլտետի ուսանողական խորհուրդը: Դասամիջոցին ՀՊՏՀ բակում տասնյակ ուսանողներ իրենց ընտրությամբ որպես նվեր ստացան գրքեր (հայ, ռուս և արտասահմանյան գրականություն) ՝ պատասխանելով գրականությանն առնչվող  տարբեր հարցերի: Յուրաքանչյուր ուսանող պետք է պատասխաներ 1 հարցի, իսկ դժվարանալու դեպքում՝ հնարավորություն էր ստանում պատասխանել  2-րդ հարցին՝ նշելով հայ, ռուս և արտասահմանյան գրողների անունները, որոնց դիմանկարները ցուցադրված էին :

Լրատվության և հասարակայնության հետ կապերի բաժնի հետ զրույցում մարքեթինգի և բիզնեսի կազմակերպման ֆակուլտետի ուսանողական խորհրդի նախագահ Գևորգ Սահակյանն ասաց, որ  գրքերը, որոնք  բաժանվեցին  տարբեր ֆակուլտետների ուսանողներին, հավաքվել էին իրենց ֆակուլտետի ուսանողների ջանքերով:

Կազմակերպիչների խոսքով՝ նախաձեռնությունը նպատակ ունի մեծացնելու  հետաքրքրությունը գրքի, ընթերցանության նկատմամբ:

Այս ակցիան մեծ խանդավառություն էր առաջացրել ուսանողների, նաև դասախոսների շրջանում: ՏԿ և ՄՏՀ ֆակուլտետի 1-ին կուրսի ուսանողուհի Մանե Գրիգորյանը մեզ հետ զրույցում ասաց, որ ընթերցանությունն իր կյանքում մեծ դեր և նշանակություն ունի:

«Ինձ համար ամենալավ և արժեքավոր նվերը գիրքն է, և այս տոնը հիանալի առիթ է ՝ ստանալու այդ նվերը: Ընդամենը 18 տարեկան եմ, բայց  կարող եմ ասել, որ կարդացածս գրքերը մեծ հետք են թողել իմ կյանքում, ընթերցանության շնորհիվ բացահայտել եմ  մի շարք  հարցերի պատասխաններ, որոնց  հանդիպում ենք կյանքում»,-նշեց ուսանողուհին՝ հավելելով, որ կարդացած վերջին գիրքը Ֆրեդերիկ Դարի  «Բոլորս մենակ ենք» ստեղծագործությունն է:

Հաշվապահական հաշվառման և աուդիտի ֆակուլտետի  2-րդ կուրսի ուսանող Վիգեն Հարությունյանը, ով  մասնակցելով ֆլեշմոբին իր ընտրությամբ նվեր էր ստացել Րաֆֆու  երկերի ժողովածուի 5-րդ հատորը («Կայծեր» և «Խաչագողի հիշատակարանը»), մեզ հետ զրույցում կարևորեց ընթերցանության դերը մարդու, հատկապես ուսանողի կյանքում:

«Ընդհանրապես, մարդու համակողմանի զարգացման  գործում  ամենամեծ դերը գրքինն է: Ինչպես ասում են՝ գիրք կարդալը նորաձև է: Ուզում եմ շնորհակալություն հայտնել մարքեթինգի և բիզնեսի կազմակերպման ֆակուլտետի ուսանողական խորհրդին՝  այս գեղեցիկ ակցիան կազմակերպելու և ուսանողներին օգտակար  գրքեր նվիրելու համար: Իմ կարդացած վերջին գիրքը Սթեյս Կրամերի «Իմ ինքնասպանությունից 50 օր առաջ» ստեղծագործությունն է, հաջորդը կլինի  Րաֆֆու «Խաչագողի հիշատակարանը», որը նվեր ստացա այսօր»,-ասաց Վիգեն Հարությունյանը:

Թեև երկար դասամիջոցն արդեն  ավարտվել էր, բայց  բակում շարունակվում էր  ուսանողների հետաքրքրությունը առաջարկվող գրքերի  նկատմամբ. մի շարք ուսանողներ պատասխանելով հարցերին՝ գիրք էին ստանում:

ՀՊՏՀ Լրատվության և հասարակայնության հետ կապերի բաժին