Երաժշտության պատմության մասին դասախոսություն՝ ՀՊՏՀ-ում
ՀՊՏՀ մեծ դահլիճում այսօր կազմակերպվել էր դասախոսություն՝ Երևանի Կոմիտասի անվան պետական կոնսերվատորիայի դասախոսների կողմից: Դասախոսությանը մասնակցում էին ինչպես ՀՊՏՀ-ականները, այնպես էլ այն ավագ դպրոցների աշակերտները, որոնց հետ բուհը համագործակցում է:
Ինչպես տեղեկացրել էինք ավելի վաղ՝ ծրագիրը Կոնսերվատորիայի «Երաժշտական զրուցակից» գեղագիտական-կրթական նախագծի շրջանակներում է:
Երևանի Կոմիտասի անվան պետական կոնսերվատորիայի դասախոս, երաժշտագետ Սեդա Շեյրանյանը ՀՊՏՀ լրատվության և հասարակայնության հետ կապերի բաժնի հետ զրույցում ասաց, որ «Երաժշտական զրուցակիցը» համագործակցում է տարբեր երաժշտական հաստատությունների, մանկատների,դպրոցների, բուհերի հետ:
«Մեծ հաճույքով ենք համագործակցում Հայաստանի պետական տնտեսագիտական համալսարանի հետ, քանի որ բուհում շատ մեծ և հետաքրքրասեր լսարան ունենք: Մեր հիմնական նպատակն է այսօրվա սերնդին ծանոթացնել հայ և համաշխարհային մշակույթին, երաժշտությանը, ինչպես նաև նպաստել երիտասարդների աշխարհայացքի, ընդհանուր զարգացմանը»:
Դասախոսության ընթացքում Սեդա Շեյրանյանը խոսեց երաժշտական ժանրերի, համաշխարհային երաժշտության ակունքների, պատմության մասին, ամփոփ ներկայացրեց երաժշտության զարգացման պատմությունը: Մեծ էր լսարանի հետաքրքրվածությունը. ունկնդիրները դասախոսության ընթացքում մի շարք հարցեր հնչեցրին:
«Երաժշտական զրուցակից» նախագծի վարիչ, Կոնսերվատորիայի դասախոս, պրոֆեսոր Վազգեն Մինասյանը լրատվության և հասարակայնության հետ կապերի բաժնի հետ զրույցում գոհունակություն հայտնեց ՀՊՏՀ ջերմ ընդունելության համար և ընդգծեց, որ համալսարանի հետ երկար տարիների համագործակցությունն արդյունավետ է:
ՀՊՏՀ օտար լեզուների ամբիոնի դասախոս Լուսինե Կարագուլյանը, ով ծրագրի կազմակերպչական աշխատանքների իրականացնողն է մեր բուհում, մեզ հետ զրույցում նշեց. «Աշակերտներին ներկայացրել ենք Տնտեսագիտական համալսարանի մասին ընդհանուր տեղեկություն՝ ֆակուլտետների, կազմի և այլնի վերաբերյալ, իսկ դասախոսության ավարտից հետո նրանց հետ շրջայց ենք կատարել ֆակուլտետներում՝ ծանոթացնելով համալսարանի առօրյային»:
ՀՊՏՀ Լրատվության և հասարակայնության հետ կապերի բաժին